Mijëra serbë protestojnë kundër pavarësisë së Kosovës
(18.12.2007 RV)Serbët mobilizohen kundër pavarësisë së Kosovës. Në Mitrovicë
është zhvilluar sot një protestë, ku serbët kanë kërkuar që të mos i jepet Kosovës
pavarësia, që të mos shkojë misioni evropian në vend, pasi është i paligjshëm dhe
që Kosova të mbetet nën sovranitetin e Serbisë. Manifestimi është zhvilluar nën mbikqyrjen
e KFOR-it, në prag të mbledhjes së Këshillit të Sigurimit të OKB-së. Përveç liderëve
serbë, morën pjesë edhe krerët e Kishës ortodokse vendase. Kundër pavarësisë është
shprehur edhe Bullgaria, nëpërmjet ministrit të saj të jashtëm, që është takuar sot
në Beograd me homologun e tij serb, Vuk Jeremiç. Sipas Ivailo Kalfin, në rajon duhet
të vazhdojë dialogu politik. Shpallja e njëanshme e pavarësisë do të ishte një zhvillim
negativ i çështjes.