Konferenca e Parisit: 7,4 miliard dollarë për palestinezët
(18.12.2007 RV)Sekretarja amerikane e shtetit, Kondolica Rajs ndodhet në Bagdad,
ku mbërriti pas një vizite të papritur në Kirkuk. Ajo është takuar me presidentin
irakuan Zhalal Talabani. Ky i fundit është njëkohësisht edhe përfaqësues i kurdëve,
territori i të cilëve është këto ditë nën sulmin e aviacionit turk, që përpiqet të
zhdukë pozicionet e militantëve të Partisë së Punës së Kurdistanit. Sipas një denoncimi
të Komisariatit të Lartë të OKB-së për Refugjatët, 300 familje, gjithsej 1.800 vetë,
janë detyruar të largohen nga zona për shkak të bombardimeve. Qeveria rajonale e Kurdistanit
irakian i ka urdhëruar peshmergët, ushtarët e vet, që të marrin pozicion mbrojtjeje.
Konferenca
e Parisit për Lindjen e Mesme arriti të dhurojë 7,4 miliard dollarë për palestinezët.
Faktikisht, shuma është shumë më e madhe se 5,6 miliardët e kërkuar nga presidenti
Abu Mazen për të shpëtuar nga “katastrofa e përgjithshme”, siç e pati quajtur ai.
Në krye të listës së donatorëve, Bashkimi Evropian, SHBA-të dhe Arabia Saudite. Ndërkaq,
në terren, forcat izraelite kanë filluar një ofensivë kundër Xhihadit islamik, duke
vrarë 10 eksponentë të tij. Grupi fondamentalist ka kërcënuar se do të hakmerret.