Në Paris, Konferenca e Donatorëve në ndihmë të palestinezëve
(17.12.2007 RV)Të mblidhen 5,6 miliard dollarë për t’ia dhënë Autoritetit Kombëtar
Palestinez. Ky është objektivi që i ka vënë vetes Konferenca e Donatorëve, që u hap
sot në Paris. Është një hap tjetër konkret pas marrëveshjes së nënshkruar nga kryeministri
izraelit Olmert dhe presidenti palestinez Abu Mazen në Anapolis të SHBA-ve. Abu Mazen
kërkoi edhe sot ndihma urgjente dhe presion mbi Izraelin që të ndalë planet ekspansioniste
për ngulimet hebraike në Territore.
U shty edhe një herë zgjedhja e presidentit
në Liban. Parlamenti, që u mblodh sot për të nëntën herë, do të zhvillojë të shtunën
një tjetër asamble për zgjedhjen e kreut të shtetit. Po kërkohet një marrëveshje mbi
ndryshimin e një neni të Kushtetutës, që do t’i hapte rrugën drejt presidencës gjeneralit
Sulejman. Aktualisht, një funksionar nuk mund të zgjidhet si president para se të
mbushë dy vjet nga lënia e detyrës. Që prej 23 nëntorit, dita e përfundimit të mandatit
të ish-presidentit Emil Lahud, Libani është pa kryetar shteti.
Flet sërish
numri dy i Al Kaidës, Al Zavahiri. Në një intervistë, të përhapur nëpërmjet internetit
islamik, zëvendësi i Bin Ladenit përsërit se Iraku është fusha më e rëndësishme e
betejës për rrjetin terrorist. Ndërkaq, vazhdojnë problemet Irak-Turqi. Qeveria e
Bagdadit ka protestuar zyrtarisht kundër sulmeve ajrore turke në zonën e Kurdistanit
irakian, me qëllim eliminimin e pozicioneve të Partisë së Punës së Kurdistanit. Operacionet
janë mbështetur nga SHBA-të.