Benedikti XVI delegacionit të Val Badisë, që i dhuroi Vatikanit Bredhin e Festave:
“Të ruhen traditat e Krishtlindjes, për t’iu kundërvënë simboleve të konsumizmit.
(14.12.2007 RV) “Bredhi
i Krishtlindjes si shenjë e jetës dhe e përshpirtërisë popullore, është simbol që
duhet ruajtur, në një shoqëri e cila ka prirjen të zgjedhë simbolet e konsumizmit”.
Me këto fjalë e priti sot Papa delegacionin e Val Badisë, zonës së gjelbëruar të Trentino-
Alto Adigjes, në pyjet e së cilës u pre bredhi monumental i Krishtlindjes, përuruar
sot pasdite në Sheshin e Shën Pjetrit. “Ky bredh, i prerë pa dëmtuar jetën e
pyllit, i zbukuruar këndshëm, - u kujtoi Benedikti XVI miqëve të dashur- do
të rrijë pranë Shpellës së Betlehemit deri në përfundim të festimeve të Krishtlindjes,
për t’u admiruar nga shtegtarët e shumtë që do të vijnë këto ditë në Vatikan nga të
katër anët e botës. Simbol kuptimplotë i Lindjes së Krishtit, sepse me gjethet gjithnjë
të blerta na kujton jetën që nuk vdes, bredhi është edhe simbol i përshpirtërisë popullore
të Luginës suaj”. Këtë theksoi Papa e në vijim porositi: “Miq të dashur,
Bredhi dhe Shpella e Betlehemit kanë elemente tipike të asaj atmosfere të Krishtlindjes,
që bën pjesë në trashëgiminë shpirtërore të bashkësive tona. Është atmosferë feje
e gëzimi në familje, të cilën duhet ta ruajmë në shoqëritë e sotme, ku nganjëherë
të krijohet përshtypja se mbisundon gara e konsumizmit, që i shtyn njerëzit të kërkojnë
vetëm vlerat materiale. Krishtlindja është festë e krishterë dhe simbolet e saj –
Shpella e Betlehemit e Bredhi i zbukuruar me dhurata – na kujtojnë posaçërisht misterin
e mishërimit e të Lindjes së Krishtit, Mbretit të Universit”.