Mijëra vetë në Prishtinë: "Duam pavarësinë"

(10.12.2007 RV)Skadoi sot afati i fundit për të arritur një marrëveshje për statusin e Kosovës. Sipas zëdhënësit të Ekipit të Unitetit, Skënder Hyseni kjo datë shënon edhe fillimin e konsultimeve me partnerët ndërkombëtarë, rreth hapave që duhet të bëjë Kosova në drejtim të shpalljes së pavarësisë, e cila do të realizohet para majit të vitit 2008. Më hollësisht për lajmet nga Kosova, të dëgjojmë Rabije Ibrajn

Ndërkaq, për Kosovën është diskutuar gjerësisht në mbledhjen e ministrave të jashtëm të Bashkimit Evropian, që përfundoi sot në Bruksel. Ajo që kërkohet është një qëndrim i përbashkët mbi të ardhmen e Kosovës. Përfaqësuesi i lartë evropian për Politikën e Jashtme, Havier Solana ka deklaruar se nëse Kombet e Bashkuara do ta shohin të arësyeshme, Bashkimi Evropian është gati të dërgojë në vend një mision civil dhe të disllokojë 1.800 ushtarë. Ndër vendet që nuk duan pavarësinë e Kosovës janë Greqia, Sllovakia, Spanja dhe Qipro. Po është sidomos kjo e fundit, që ngul këmbë më shumë së të tjerat, duke pasur frikë se modeli i Kosovës merret më vonë si shembull edhe nga pjesa turke e ishullit.
E ky argumentim përdoret gjerësisht edhe nga Rusia, përkrahëse historike e serbëve. Ministri i jashtëm rus, Sergei Lavrov paralajmëroi se ata që favorizojnë ndarjen e Kosovës nga Serbia duhet t’i vlerësojnë mirë pasojat. Për Lavrovin, dhënia e pavarësisë është dhunim i hapur i së drejtës ndërkombëtare. Serbia nga ana e saj, nuk ka ndërmend ta shkëmbejë Kosovën me integrimin në Bashkimin Evropian, pavarësisht se kjo kërkohet me ngulm nga disa ministra të jashtëm, ndër të cilët italiani Masimo D’Alema. Qëndrimi i njohur u përsërit sot si nga zv.kryeministri serb, Bozhidar Gjeliç, ashtu edhe nga ministri për Kosovën, Sllobodan Samarxhiç, i cili ishte për vizitë në Mitrovicë. Madje, sipas shefit të shtatmadhorisë së ushtrisë së Beogradit, gjeneralit Zdravko Ponosh ekzistojnë plane ushtarake, sipas skenarëve të mundshëm në Kosovë.