Vullnetarët - protagonistë në hapjen e kremtimeve për 150-vjetorin e dukjeve të Zojës
në Lurdë.
(08.12.2007 RV)Fjalët e Benediktit XVI në lutjen e sotme të Engjëllit të Tënzot
arritën simbolikisht në Lurdë, ku kardinali Ivan Dias, prefekt i Kongregatës për Ungjillëzimin
e Popujve, hapi zyrtarisht vitin jubilar të dukjeve të Zojës së Bekuar Bernardetës
Subiru në Shpellën e Masabielës. Duke filluar që sot e deri më 8 dhjetor 2008,
në Lurdë do të kremtohet Viti jubilar në përkujtim të 150-vjetorit të dukjeve të Zojës
së Bekuar në Shpellën e Masabielës. Kalendari i veprimtarive, që do të vijojnë dymbëdhjetë
muaj me radhë, gjatë të cilëve parashikohet dyndja e 8 milion shtegtarëve – është
shumë i pasur e i përqëndruar në 12 tipe misionesh, që do t’i kushtohen kryesisht
të sëmurëve, të përjashtuarve nga radhët e shoqërisë, paqes, të rinjve dhe vullnetarëve.
E – siç nënvizon një komunikatë e Sallës vatikanase të Shtypit, pikërisht vullnetarët
ishin protagonistët e hapjes së kremtimeve: 3.500 prej tyre morën pjesë në takimin
‘Kisha në mision ndërmjet njerëzve vullnetmirë”Kardinali Paul Jozef Kordes, kryetar
i Këshillit Papnor Cor Unum, kremtoi dje për ta Meshën Shenjte në bazilikën e nëndheshme
të Shën Piut X, ndërsa sot foli në Sesionin plenar të takimit ndërkombëtar “Enciklika
‘Zoti është dashuri’ dhe vullnetariati”.