(09.12.2007 RV)Sot, e Diela II
e Kohës së Ardhjes, u përkujtuan edhe Shën Huan Diego; Shën Leokadia, virgjër e martire;
Shën Siri, ipeshkëv i Pavisë dhe Shën Pjetër Furnie, kanonik rregulltar.
'Ja
Zoti ynë po vjen të na shpëtojë! – ky është lajtmotivi me të cilin fillon kjo javë,
në ditën e parë të së cilës, të hënën, do të kremtohen Zoja e Loretos, Shën
Mauri martir e Shën Gregori III papë. Pritja e Zotit, ashtu si ardhja e tij, janë
çështje feje, e në se ne kemi fe, Hyji, me dhuratën e shërimit, do të na bëjë jo vetëm
të ecim, por të vrapojmë; jo vetëm të flasim, por edhe të bërtasim, kur është nevoja.
Në liturgjinë e festës së Shën Damazit I papë, të martën e ardhshme,
Kisha na kujton se Ati qiellor ka gjithnjë fjalë ngushëlluese për çdo njeri, edhe
për ata, të cilët e kanë humbur rrugën që çon drejt Tij.
Zoti na fton të kthehemi
në rrugë të drejtë, për të gjetur ngushëllim. E kur e kuptojmë se nuk jemi të aftë
ta përballojmë jetën pa ndihmën e Zotit, ai na jep forcë e krahë shqiponjash, për
të fluturuar drejt lartësive. Këtë na kujton, të mërkurën, festa e Zojës së
Guadalupes dhe e Shën Gjovanës de Shantal.
Të enjten ështëfesta
e Shën Luçisë së Sirakuzës, virgjër e martire (shqipëruar Drita) dhe e Shën Aristonit,
martir i Portos. Liturgjia e së kremtes na kujton se Zoti është i durueshëm
e i pasur me hir. Prandaj njerëzit vijojnë ta kërkojnë në shekuj, por nganjëherë nuk
arrijnë ta gjejnë, sepse për ta gjetur, duhet kërkuar ndërmjetësimi i lajmëtarëve
të tij, si Shën Gjon Pagëzuesi. Përndryshe njeriu i ngjet atij që duke pasur etje,
e kërkon ujin atje ku nuk gjindet.
Në rrjedhë shekujsh Zoti i është dëftuar
njerëzve shumë herë e në shumë mënyra, por ata e patën të vështirë ta pranojnë. Shën
Gjon Pagëzuesi nuk i bindte, sepse tepër i ashpër, ndërsa Jezusi, pse tepër i butë.
Ky është reflektimi që na sjell në mend, të premten e ardhshme, festa e Shën
Gjonit të Kryqit, meshtar e doktor i Kishës, karmelitan i zbathur.
Java
mbyllet të shtunën e ardhshme, me Shën Valerianin, ipeshkëv në Afrikë e martir,
i cili na nxit të meditojmë mbi rëndësinë e mesazhit të Shën Gjon Pagëzuesit, krahasuar
nga Krishti me Elinë. E kjo, sepse Shën Gjoni na fton të pendohemi e të kthehemi plotësisht
në rrugën e Zotit.