Papa në lutjen e Engjëllit të Tënzot: ‘Zoja e Papërlyer, model për të rinjtë, që e
kanë humbur aftësinë ta vlerësojnë dashurinë dhe trupin e tyre”.
(08.12.2007 RV)Të rinjtë e sotëm
janë jetimë të dashurisë së vërtetë e viktima të mesazheve që i shtyjnë ta konsiderojnë
ndjenjën e dashurisë dhe trupin e tyre si mall tregu. Qortimi i Benediktit XVI gjatë
lutjes së Engjëllit të Tënzot në Sheshin e Shën Pjetrit, u shoqërua nga urimi që Zoja
e Papërlyer, e cila u kremtua në liturgjinë e sotme, t’u dëshmojë sa i lartë e sa
i bukur është plani i Hyjit, që e fton çdo njeri të jetë i shenjtë e i panjollë në
dashuri. Në makrokozmosin e të rinjve të sotëm, mospërlyerja është vlerë e humbur.
Të rinjtë nuk e kuptojnë mesazhin e Marisë, ‘Nënës së dashurisë së bukur’, prandaj
gjithnjë më shpesh e në moshë gjithnjë më të njomë, e shfrytëzojnë dashurinë, e shesin,
përdhunojnë ndjenjat më të bukura e përdhunohen, siç ngjet me shumë fëmijë, për faj
të të rriturve pa skrupuj e të mesazheve, sipas të cilave trupi nuk ka shenjtëri që
duhet mbrojtur, por kërkesa, që duhen përmbushur. Është ditë feste, solemniteti
i Zojës së Papërlyer, që Papa e Vatikani e quajnë ‘shenjë e sigurtë shprese e ngushëllimi’.
Por për Benediktin XVI është edhe rast për një vërejtje të dhimbshme, mbi një farë
bote rinore, realiteti i së cilës, i pasqyruar nga kronikat, nuk përkon fare me bukurinë
plot shkëlqim të Zojës së Papërlyer: “Mendoj për të rinjtë e sotëm, të rritur
në një mjedis të ngopur me mesazhe që propozojnë modele të rreme lumturie. Këta djem
e vajza –tha me keqardhje të thellë Ati i Shenjtë - rrezikojnë të humbasin
shpresën e, gjithnjë më shpesh, duken si jetima të dashurisë së vërtetë, që e mbush
jetën me kuptim e me gëzim”. Një duartrokitje e stuhishme u ngrit nga Sheshi,
kur Benedikti XVI kujtoi propozimet e Gjon Palit II bërë të rinjve, të cilët i deshi
aq shumë, për ta pasur si model ‘ Nënën e dashurisë së bukur’. Prandaj – vijoi Benedikti
XVI – nuk mund të mos trishtohesh kur shikon se si të rinjtë e humbasin mahnitjen,
magjinë e ndjenjave më të bukura, vlerën e respektimit të trupit, shprehje e njeriut
dhe e misterit të tij të pamatshëm. “Nuk janë të pakta përvojat që, për fat
të keq, tregojnë se adoleshentët, të rinjtë e deri fëmijët, kthehen në viktima që
bien lehtë pre e zvetënimit të dashurisë, të gënjyer nga të rriturit pa skrupuj të
cilët, duke mashtruar vetveten e ata, i joshin në udhën pa krye të konsumizmit: edhe
realitetet më të shenjta bëhen kështu mall tregu; e kjo gjithnjë më shpesh, që para
adoleshencës”. Për këto të rinj të joshur nga mesazhe kaq të rrezikshme e për
mbarë Kishën, Papa iu lut Marisë t’ia ndriçojë njerëzimit udhën që çon tek Jezusi,
posaçërisht në këtë Kohë të Ardhjes. E, në Zënien e saj pa faj – pohoi Papa – Maria
nuk është vetëm Nënë e njerëzimit, por edhe Nënë e shpresës: “Asaj ia drejtojmë
plot me fe lutjen tonë, në sa nisemi simbolikisht për shtegtim në Lurdë, ku pikërisht
sot filloi një vit jubilar me rastin e 150-vjetorit të dukjeve të saj në Shpellën
e Masabielës. Zoja e Papërlyer “ylli i detit”, ndriço mbi ne e na prij në shtegtimin
tonë!”- u lut Ati i Shenjtë. Në përfundim të lutjes së Engjëllit të Tënzot,
Papa i përshëndeti mijëra shtegtarët e pranishëm në Sheshin e Shën Pjetrit në pesë
gjuhë dhe i ftoi të marrin pjesë në takimin e pasdites për homazhet tradicionale te
Shtatorja e Zojës së Papërlyer në Sheshin romak të Spanjës.