MINISTRI I FINANCAVE, RIDVAN BODE, NENSHKRUAN MARREVESHJE ME SELINE E SHENJTE PER
DISA ÇESHTJE EKONOMIKE DHE TATIMORE
(3.12. 2007 RV) nga ATSH-ja.- Ministri i Financave, Ridvan Bode, nënshkroi
të Hënën, në emër të Qeverisë shqiptare, një marrëveshje me Selinë e Shenjtë mbi disa
çështje ekonomike dhe tatimore. Sipas burimeve të kësaj ministrie, synimi
i kësaj marrëveshjeje është përcaktimi i qartë i një kuadri ligjor përkatës mbi ecurinë
normale të veprimtarisë së Kishës Katolike në Shqipëri dhe rregullimin e disa çështjeve
me natyrë ekonomike dhe tatimore, për të zotëruar dhe administruar në mënyrë të pavarur
të mira dhe burime ekonomike të nevojshme për zhvillimin e misionit të vet.
Nunci Apostolik, Arqipeshkvi Giovanni Bulaitis, i cili nënshkroi në emër të Selisë
së Shenjtë, ka shprehur mirënjohjen e Kishës Katolike dhe të Papës për bashkëpunimin
shumë të mirë me ministrinë e Financave të Shqipërisë dhe nënshkrimin e kësaj marrëveshjeje,
e cila çliron nga detyrimet tatimore Selinë e Shenjtë. Ministri Bode ka vlerësuar
rolin e Kishës Katolike për të ndihmuar njerëzit në nevojë në këtë periudhë të ringjalljes
dhe ringritjes së ekonomisë së vendit, ndërsa ka siguruar përfaqësuesit e Vatikanit
se administrata do të ekzekutojë me përpikmëri këtë marrëveshje. Në marrëveshje
parashikohet që Kisha Katolike, mund të sigurojë lirisht dhe të marrë ndihma materiale
ose të financuara nga besimtarë dhe dhurues, edhe jashtë vendit. Subvencionet financiare
të çfarëdo lloji dhe çdo e ardhur tjetër e ligjshme nuk do t'i nënshtrohen asnjë lloj
takse apo tatimi. Kisha Katolike është e përjashtuar nga taksa mbi pasurinë, ndërtesat
në pronësi ose në përdorim të Kishës, enteve të saj apo institucioneve të saj kur
ato përdoren për veprimtaritë e njohura të Kishës dhe jo për arësye fitimi. Pasuritë
e luajtshme dhe të paluajtshme të Kishës ose të enteve të saj, të cilat përdoren për
veprimtari jo fitimi, janë të përjashtuara nga pagimi i taksës së trashëgimisë ose
të kalimit të pasurisë, në rastin e dhurimeve. Delegacioni i Selisë së Shenjtë
përbëhej edhe nga Kreu i Kishës Katolike në Shqipëri, Arqipeshkvi i Tiranës-Durrësit
Imzot Rrok Mirdita dhe Arqipeshkvi i Shkodrës, Imzot Angelo Massafra.