(02.12.2007 RV)Sot Kisha katolike përkujtoi Shën Bibianën, patrice romake,
virgjër e martire; Shën Pimenin, martir dhe Shën Silverin, papë. Po ndalemi më
hollësisht tek figura e Shën Bibianës. Emri Bibianë rrjedh nga Vivianë, që në greqisht
do të thotë jetë = bios. Kështu emri i saj u bë sinonim i gjallërisë, shkathtësisë,
i njeriut plot jetë. E lindur në Romë në vitin 352, Bibiana, sipas passio-s apo historisë
së martirizimit të saj, shkruar në shekullin VII, është ndërmjet viktimave të persekutimit
të të krishterëve në kohën e Julit, njohur me epitetin Apostati, apo Sakrilegji.
Virgjërës Martire, pasi e torturuan, për ta bërë të mohonte Krishtin, i prenë
kokën. E sot kjo kokë ruhet në kapelën e të Kryqëzuarit në bazilikën e Shën Marisë
së Madhe në Romë dhe ekspozohet për besimtarët në ditët e krezhëmve si dhe më 2 dhjetor,
në festën e saj. Martirizimi i shenjtes ka frymëzuar shumë artistë, që kanë realizuar
një numër të madh ikonash kushtuar Virgjërës Martire, e jo më pak devocionit popullor
ndaj saj. Njihet si pajtore për ata që kanë dhimbje koke, ngerrçe, sëmundjen që në
Shqipëri quhet "e tokës", alkoolizmit dhe aksidenteve. Shën Bibiana në traditën popullore
ka edhe rëndësi meteorologjike. Thuhet se në ditën e festës së saj mund të bëhen parashikime
se si do të jetë dimri në vijim.