(02.12.2007 RV) Sot, e Diela I e Kohës së Ardhjes, u përkujtuan edhe Shën Bibiana,
matronë romake, Shën Pimeni, martir dhe Shën Silveri, papë Të hënën, duke
nisur vitin e ri liturgjik me Kohën e Ardhjes, rilind shpresa se Shëlbuesi do të vijë
të na çlirojë, shpresë e cila ia përtrin fuqitë njeriut që beson në ardhjen e Mesisë.
Kjo ardhje është vërtetë çliruese: na çliron nga sëmundjet fizike e shpirtërore, nga
mëkati e nga vdekja. Kremtohet, të hënën, Shën Françesk Saveri, meshtar jezuit, apostull
i Indive, Pajtor i Misioneve. Në liturgjinë e festës së Shën Gjon Damashenit,
meshtar e doktor i Kishës dhe të Shën Barbarës martire, të martën e ardhshme,
kujtohet se Ai që u premtua, do të jetë i shguruari i Zotit, përplot me Shpirtin Shenjt
e do të dijë t’i risjellë njerëzimit pastërtinë e krijimit: lum ata që i dëgjojnë
fjalët e tij, që pendohen e kthehen në rrugën e Zotit. Shumëzimi i
bukëve e i peshqve është simbol i dhuratës së ardhshme të Eukaristisë: përmes kësaj
dhurate, Jezusi jo vetëm që vijon të kryejë mrekulli e të shërojë të sëmurët, por
rri me ne çdo ditë; e kështu mund ta parashijojmë sofrën e amshuar të Mbretërisë së
qiellit. Këtë na kujton, të mërkurën, Shën Saba abat në festën e tij. Të
enjten, festa eShën Nikollës së Barit, ipeshkëv i Mirës, liturgjia na
kujton se të dëgjosh Fjalën e Hyjit, do të thotë edhe ta pranosh mesazhin e saj: kush,
pastaj, e jeton, është si shtëpia e ndërtuar mbi shkëmb. Mund të ndodhin shumë gjëra
në jetë, por në se i kemi rrënjët në Fjalën e Hyjit, do të mund ta jetojmë çdo ngjarje
në mënyrë krejt të re. Të premten e ardhshme do të kremtohet festa e Shën
Ambrozit, ipeshkëv i Milanos e doktor i Kishës. Na kujton se mrekullia e vërtetë e
Jezusit, për të cilën na flet liturgjia, nuk është aq shërimi i verbërisë fizike,
sa shërimi i verbërisë së zemrës: në se besojmë se zemra mund të ndryshojë, ai do
të na e ndryshojë me të vërtetë. Java mbyllet të shtunën e ardhshme, me
Solemnitetin e Zojës së Papërlyer, që na shtyn të reflektojmë për mrekullitë e dashurisë
së Hyjit. Që prej amshimit Hyji e zgjodhi Marinë si Nënë të Birit të tij; për ta kryer
këtë mision, ajo u zu e pamëkat. Kjo do të thotë se për hir të Hyjit e për virtyt
të Jezu Krishtit, Maria u ruajt nga mëkati i rrjedhshëm që nga zënia e saj.