Në audiencën e përgjithshme: katekizmi kushtuar Shën Efremit, teolog i shekullit IV
dhe thirrja e Benediktit XVI për të sëmurët nga Sida.
(28.11.2007 RV)Qestja e Shpirtit
Shenjt: kështu, me një shprehje të traditës së krishterë e kujtoi Papa Shën Efrem
Siriakun, të cilit i kushtoi sot katekizmin e audiencës së përgjithshme. Në përfundim
të katekizmit, Ati i Shenjtë bëri thirrje për të sëmurët nga Sida, në kuadrin e Ditës
Botërore kushtuar betejës kundër sëmundjes së tmerrshme, që bie më 1 dhjetor. “Duke
e përdorur në mënyrë të gabuar lirinë, njeriu e përmbys rendin e kozmosit”: këtë pohoi
Papa në sa kujtonte mësimet e Efremit mbi temën e Hyjit krijues, ndërmjet të cilave,
edhe mësimi i mëposhtëm i përfaqësuesit më simbolik të krishterimit në gjuhën siriake,
poetit më të përmendur të të gjithë epokës patristike: “Në krijim, asgjë nuk është
e izoluar e bota, përkrah Shkrimit Shenjt, është Bibla e Hyjit”. Benedikti XVI
e kujtoi figurën e Efremit, lindur në vitin 306 e vdekur nga murtaja, që iu ngjit
në sa u shërbente të sëmurëve, duke u ndaluar në mënyrë të posaçme tek veprimtaria
e tij e shquar në shërbim të të gjithëve aq, sa që bashkëkohasit e kujtojnë me epitetin
‘shërbyesi’. Ai – shpjegoi Papa – i përkiste kategorisë së njerëzve që ia kushtojnë
krejt jetën Krishtit në shërbim të bashkësisë kishtare, duke i jetuar besnikërisht
kushtet e virgjërisë e të varfërisë. Njeri tejet i thjeshtë, Efremi mbeti deri në
vdekje diakon. Ai e thelloi reflektimin teologjik përmes poezisë e mund të themi se
tipari kryesor i veprës së tij është takimi i teologjisë me poezinë: “Teologjia,
reflektimi fetar, poezia, kënga, lavdërimi i Hyjit shkrihen së bashku e pikërisht
në këtë karakter liturgjik të teologjisë së tij, duket qartë e vërteta hyjnore”. Në
veprën e tij përdori me sukses të madh sidomos simbolin, në sa këndonte teologjinë
në një poezi tepër të pasur me figura letrare të marra nga natyra, nga jeta e përditshme
e nga Bibla – shpjegoi Papa – duke nënvizuar vlerën katekistike të kësaj vepre e duke
pohuar se është plotësisht aktuale për jetën e kishave të ndryshme të krishtera. Benedikti
XVI nënvizoi se në veprën e Efremit pasqyrohet edhe roli i gruas, për të cilën flet
gjithnjë me delikatesë e respekt. Duke shkruar se ‘Banesa e Jezusit ishte kraharori
i një gruaje’ – shtoi Papa – Efremi e lartoi jashtëzakonisht dinjitetin e gruas. Ati
i Shenjtë kujtoi, më pas, edhe figurat kryesore që përdori teologu-poet, në sa i këndonte
Eukaristisë: janë prushi e perla.Pas përshëndetjeve në gjuhë të ndryshme, në kuadrin
e Ditës Botërore kundër Sidës, Benedikti XVI kujtoi të gjithë ata që vuajnë nga sëmundja
e tmerrshme e jo më pak, edhe familjet e tyre, posaçërisht ato që janë në zi për humbjen
e ndonjerit prej pjesëtarëve: “Dëshiroj t’i nxis të gjithë njerëzit vullnetmirë
t’i shumfishojnë përpjekjet për të frenuar përhapjen e Sidës, për t’iu kundërvënë
mospërfilljes që tregohet shpesh ndaj saj e për t’i mjekuar të sëmurët, posaçërisht
kur janë ende të mitur”.