Izraelitët e palestinezët impenjohen për paqe brenda vitit 2008
(28.11.2007 RV)Konferenca ndërkombëtare mbi Lindjen e Mesme në Anapolis përfundoi
me një impenjim të qartë: Izraeli dhe Autoriteti Palestinez duhet të arrijnë një marrëveshje
për paqen brenda vitit 2008. Një rezultat i rëndësishëm, pas shtatë vjetëve të bllokimit
të bisedimeve ndërmjet palëve. E megjithatë, konsensusi i Merilendit iu nënshtrua
menjëherë kritikave dhe anatemave të aktorëve të ndryshëm të skenarit gjeopolitik,
në të cilin mbretëron një skepticizëm i dukshëm. Kreu i partisë izraelite Likud në
opozitë, Benxhamin Netanijahu u kërkon partive konservatore të koalicionit në pushtet,
të dalin prej tij dhe akuzon kryeministrin Olmert se po shet vendin. Irani i Ahmadinexhadit
siguron se “Izraeli nuk do të mbijetojë”. Siria deklaron se është bërë një hap përpara,
por ngul këmbë në “tërheqjen e plotë të pushtuesve nga tokat arabe” e pra edhe nga
Lartësitë e Golanit, të okupuara në vitin 1967. Për Hamasin, konferenca e Anapolisit
është si të mos ketë ekzistuar kurrë. Ndërsa ne po transmetojmë, presidenti amerikan
Xhorxh Bush dhe liderët izraelitë e palestinezë po mbajnë një konferencë të përbashkët
shtypi, ku po sanksionojnë impenjimin e mëtejshëm në rrugën e paqes. Presidenti Bush
u takua më parë veç e veç me ta e më pas në një bisedë tripalëshe. Edhe Rusia do fetën
e saj të tortës, tani që kjo bëhet interesante. Sipas ministrit të jashtëm rus, Sergei
Lavrov konferenca tjetër ndërkombëtare për Lindjen e Mesme do të mbahet në Moskë,
në një datë që duhet caktuar akoma. Ndërkaq, mbledhja e parë e komisionit të përbashkët
izraelito-palestinez, me detyrën për të përgatitur dhe koordinuar negociatat, do të
mbahet më 12 dhjetor. Ndërkohë, Olmert dhe Abu Mazen do të vazhdojnë të takohen çdo
15 ditë. Olmert paralajmëroi se skadenca e fundit të 2008-ës ndoshta nuk do të mund
të respektohet, por garantoi maksimumin e përpjekjeve. Pëlqehet apo jo, procesi rifilloi.