Edhe një natë tjetër dhune në periferitë e Parisit e lajme të tjera
(27.11.2007 RV)Klima ndryshon me shpejtësi dhe përgjegjësia bie mbi vendet
e industrializuara, të cilat nuk reduktojnë emetimin e gazit që shkakton ngrohjen
globale. Këto janë rezultatet e pasqyruara në Raportin mbi zhvillimin njerëzor 2007/2008,
publikuar nga Programi i OKB-së për Zhvillimin, me titull “T’u rezistojmë ndryshimeve
të klimës”. Në raport kërkohen masa urgjente për të përshtatur politikat energjitike
me reduktimin e emetimit të gazrave të dëmshme deri në 80% brenda vitit 2050. Kombet
e Bashkuara vënë në dukje se ata që paguajnë më tepër për këto ndryshime janë vendet
e pazhvilluara.
Edhe një natë tjetër dhunë në periferitë e Parisit.
Pas natës të së dielës, protestat e shkaktuara nga vdekja e dy të rinjve në një aksident
rrugor me makinën e policisë së zonës, edhe nata e djeshme u karakterizua nga manifestime,
dhunë e ndeshje me policinë. Bilanci: 82 agjentë të plagosur, dyqane e restorante
të shkatërruara, një bibliotekë dhe dhjetra makina e kazane plehrash në flakë. Nesër,
në Elize, takim për sigurinë kombëtare.
Gjeorgjia ka njoftuar se më 5 janar,
ditën e zgjedhjeve presidenciale të parakohshme, do të mbahet edhe një referendum
mbi integrimin e vendit në NATO. Një rezultat pozitiv i tij, do t’i jepte Moskës
një sinjal tjetër të avancimit amerikan, pas mbrojtjes me raketa në Poloni e Revolucionit
Portokalli në Ukrainë. Ndërkaq, akuzës ruse se vëzhguesit e OSBE-së që hoqën dorë
nga monitorimi i zgjedhjeve presidenciale të 2 dhjetorit janë frymëzuar nga amerikanët,
Shtëpia e Bardhë i përgjigjet me vënien në dukje të gjendjes së rëndë të të drejtave
të njeriut në Rusi.