Austri: Prishtina hedh poshtë propozimin serb për vetëqeverisje
(27.11.2007 RV)Vazhdon takimi serbo-kosovar në Baden afër Vjenës, me ndërmjetësimin
e Treshes ndërkombëtare. Sot, Kosova hodhi poshtë propozimin serb për t’i dhënë asaj
të drejtën e vetëqeverisjes. Sipas një note të zyrës së presidentit serb, Boris Tadiç,
Beogradi do të mbante për vete kontrollin mbi politikën e jashtme, mbrojtjen, kufijtë
dhe trashëgiminë serbe. Rusia po përpiqet me çdo mënyrë të gjejë argumente për
ta shtyrë afatin e bisedimeve edhe pas 10 dhjetorit, por shqiptarët e bënë të qartë
se nuk kanë ndërmend të vazhdojnë më tej. Arrijnë edhe kërcënimet nga Beogradi. Një
zyrtar, i cituar nga agjensia amerikane e lajmeve Associated Press (Ësoshiejtid Pres),
ka deklaruar se Serbia do të vendosë një embargo të plotë ekonomike dhe bllokimin
e udhëtimeve, ku përfshihen ndërprerja e furnizimit me energji elektrike dhe ndalimi
i kalimit të kufirit për shqiptarët dhe mallrat e tyre.
Deputeti i vetëm
shqiptar në Parlamentin e Serbisë, Riza Halimi ka shprehur shqetësim për militarizimin
e Luginës së Preshevës nga ana e Beogradit. Reagimi vjen pas deklaratës së ministrit
serb të Mbrojtjes, Dragan Shutanovac për shtimin e trupave ushtarake në Preshevë dhe
Bujanoc.
Debat ndërmjet kryeministrit shqiptar, Sali Berisha dhe zv.kryeministrit
serb, Gjeliç për çështjen e Kosovës, në Takimin e kryetarëve të qeverive të Nismës
së Evropës Qendrore në Sofje. Mollë sherri, deklarata e Berishës, sipas të cilit,
zgjatja e procesit të përcaktimit të statusit të Kosovës do të sillte rreziqe të paparashikuara
dhe do të vinte në dyshim të gjitha sukseset e arritura deri tani nga Prishtina. Në
shënjestrën e kryeministrit të Shqipërisë edhe qëndrimi i Serbisë dhe i Rusisë, të
cilat kanë krijuar një rreth vicioz në dëm të stabilitetit të krejt rajonit. Për zv.kryeministrin
e Serbisë, Bozhidar Gjeliç, kjo ka qenë një ndërhyrje në punët e brendshme të Beogradit.