Benedikti XVI kardinajve të rinj: “Kisha të jetë gati për t’iu përgjigjur kërkesave
të njerëzve të kohës sonë”.
(26.11.2007 RV)“Të jeni gjithnjë
dëshmitarë bujarë të dashurisë së Krishtit”: këtë porosi u dha Papa të gjithë besimtarëve
gjatë takimit të sotëm në Sallën e Palit VI me 23 kardinajtë e rinj, të krijuar në
Konçistorin e së shtunës së kaluar. Papa i priti kardinajtë e rinj, së bashku me
familjarët e miqtë. Një audiencë – siç u shpreh vetë Shenjtëria e Tij në fjalimin
e mbajtur në gjuhë të ndryshme - që përfaqësonte mirë katolicitetin e Kishës – gjatë
së cilës Papa u dhuroi kardinajve të rinj një kopje të veçantë të Katekizmit të Kishës
Katolike, të pasuruar me 49 figura jashtë tekstit e 8 miniatura. Ishte çast vërtetë
festiv, takim i zhvilluar në atmosferë të thellë bashkimi me Pasardhësin e Shën Pjetrit
ky i sotmi për Benediktin XVI dhe 23 kardinajtë e rinj, të shoqëruar nga familjarët
e nga miqtë e ardhur nga të katër anët, për të qenë pranë tyre në këtë çast kaq të
rëndësishëm. E pikërisht miqtë Papa i nxiti t’u qëndrojnë gjithnjë pranë kardinajve,
ashtu si në këto ditë të mëdha, kur iu bënë kurorë me praninë e tyre të ngrohtë. Duke
u folur kardinajve për miqtë e pranishëm, Papa theksoi: “E nxis secilin prej
tyre që të mos jua kursejnë kurrë miqësinë, nderimin e lutjen, duke ju ndihmuar kështu
t’i shërbeni me besnikëri Kishës e të jepni, në detyra e shërbime të ndyshme, që ju
beson Provania Hyjnore, një dëshmi gjithnjë më bujare të dashurisë së Krishtit”. Më
pas Ati i Shenjtë u kërkoi anëtarëve të Kolegjit kardinalor ta shoqërojnë me përvojën
e tyre baritore e njerëzore: “Për mua ka shumë vlerë ndihma juaj, që të mund
ta kryej sa më mirë detyrën time në shërbim të mbarë popullit të Hyjit”. Ati
i Shenjtë vuri theksin edhe tek shërbimi që Pasardhësi i Shën Pjetrit, së bashku me
barinjtë, duhet t’u ofrojë besimtarëve të mbarë botës: “Vijoni të luteni për
ta e edhe për mua, që të jetë gjithnjë i fuqishëm bashkimi i barinjve me Papën, në
mënyrë që t’i japin mbarë botës dëshminë e një Kishe, besnike ndaj Krishtit dhe e
gatshme për t’iu përgjigjur me guxim profetik kërkesave shpirtërore të njerëzve të
kohës sonë”. Duke folur në gjuhën frënge, Benedikti XVI nëvizoi rëndësinë
që ka për kardinajtë e rinj lutja e besimtarëve. E edhe në gjuhën angleze Papa i nxiti
besimtarët t’i shoqërojnë kardinajtë me lutje, duke vënë theksin edhe tek lidhja që
ekziston ndërmjet kardinajve e Papës si simbol i unitetit të Kishës.Në spanjisht iu
lut Virgjërës Mari t’i ruajë kardinajtë e rinj e t’i ndihmojë që shërbimi i tyre ndaj
Kishës të jetë shumë i frytshëm.