Veprimtari festive me rastin e 28 nëntorit në Romë.
(25.11.2007 RV)Afrohet festa kombëtare
e shqiptarëve, 28 Nëntori e me të, nisin edhe takimet përkujtimore 2007. Dy takimet
e para festive u mbajtën dje e sot në mjediset e Rrethit italo-shqiptar të Kulturës
‘Besa, në Romë, ku arbëreshë e shqiptarë vijuan traditën e bukur të përkujtimit festiv. Sot,
në orën 10. 30, pranë Kishës së Shën Athanasit, për të gjithë shqiptarët që jetojnë
në Atdhe e nëpër botë, u kremtua Liturgjia Hyjnore në gjuhën shqipe e kënduar me muzikën
e Atë Nilo Somma, meshtar- murg arbëresh i Manastirit të Grotaferratës. Ndërsa
në takimin që u mbajt dje në sallën e Rrethit “Besa”, shqiptarët e shumtë, mbledhur
me këtë rast, përkujtuan Atdheun e largët përmes një figure që mbetet simbol i krenarisë
kombëtare, Nënë Terezës, në 10-vjetorin e vdekjes. Takimi nisi me fjalën e frymëzuar
e prekëse të doktoreshës Katerina Xukaro, përkthyese e disa veprave kushtuar Nënë
Terezës. Studiuesja arbëreshe hodhi dritë të re mbi figurën madhore të Rregulltares,
parë në këndvështrimin e shqiptarësisë së saj. Më pas u projektua një dokumentar
kushtuar Nënë Terezës, vepër e regjisorit shqiptar, Gjon Kolndrekaj. Në ekranin e
televizorit që ishte vënë me këtë rast në qendër të sallës, parakaluan pamje të viseve
ku shkeli bamirësja e madhe, fytyra të dashura për të, njerëz të jashtëzakonshëm e
të zakonshëm, të Kishës e të Shtetit, që e njohën e e vlerësuan veprën e saj madhore.Ishte
një pasdite prekëse, që u kujtoi të pranishmëve, me krenari, Atdheun e largët e Flamurin
e tij, shpalosur për herë të parë në Vlorë, më 28 nëntor 1912.