У суботу 24-га лістапада ў Ватыкане адбылася Публічная Звычайная Кансысторыя
Напярэдадні ўрачыстасьці Госпада Нашага Ісуса Хрыста- Валадара Сусьвету, якую
Касьцёл будзе ўшаноўваць ў нядзелю 25-га лістапада, у суботу раніцай ў Базыліцы Сьвятога
Пятра адбылася Публічная Кансысторыя, ў часе якой Папа Бэнэдыкт 16 паднёс да годнасьці
кардыналаў 23х Пралатаў Каталіцкай Царквы. Сярод іх былі, сярод іншых, монс. Сандры
- Прэфэкт Кангрэгацыі для Усходніх Цэркваў, монс. Кордэс - Прэзыдэнт Папскае Рады
“Кор Унум”, монс. Рылко ( па нацыянальсьці паляк)- Прэзыдэнт Папскае Рады да спраў
сьвецкіх асоб ды монс.Баняско- старшыня Эпіскапскае Канфэрэнцыі Італіі. У сваёй
прамове да новых кардыналаў Папа сказаў: (Голас) :-У гэтай
Ватыканскай Базыліцы Сьвятога Пятра, сэрцы хрысьціянскага сьвету, аднаўляецца сёньня
знамянальнае ды ўрачыстае царкоўнае здарэньне: менавіта Публічная Звычайная Кансысторыя,
ў часе якой 23 новыя Пралаты атрымалі кардынальскія берэты на знак тытулярных сталіц.
Гэта здарэньне,- працягваў Сьвяцейшы Айцец,- якое выклікае надзвычайныя эмоцыі, і
не толькі для тых, што ад сёньня сталі членамі Кардынальскае Калегіі, але для ўсяго
Каталіцкага Касьцёла, які цешыцца з гэтага знаку адзінства католікаў. Сёньняшняя
ўрачыстасьць жадае падкрэсьліць значэньне заданьняў, да якіх пакліканыя новыя кардыналы,
цесна супрацоўнічаючы з Наступнікам Сьвятога Пятра, яктаксама запрашае Божы Народ
маліцца за новых Кардыналаў, каб у сваім служэньні заўсёды былі вернымі Хрысту аж
да аддаваньня, калі трэба, свайго жыцьця за Яго ў імя Эвангэльля. Будзьце Апосталамі
Госпада,- зьвярнуўся Папа Бэнэдыкт 16 да новых кардыналаў,- які ёсьць Любоў”ю, ды
будзьце сьведкамі эвангэльскай надзеі: гэтага чакае ад вас хрысьціянскі народ. Сённяшняя
ўрачыстасьць падкрэсьлівае вялікую адказнасьць, якая ляжыць на кожным з вас. Заўтра,-
сказаў на заканчэньне сваёй прамовы Папа да новых кардыналаў,- у гэтай самай Базыліцы
буду мець радасьць адслужыць з вамі Эўхарыстыю ды надзяліць кожнаму з вас кардынальскі
пярсцёнак. Гэта будзе нагода яшчэ раз выявіць нашую еднасьць ў Хрысьце ды аднавіць
разам жаданьне служыць Яму з вялікаю шчодрасьцю." Пасьля сёньняшняе ўрачыстасьці
лік Кардынальскае Калегіі павялічыўся да 201 членаў.