Актыўны ўдзел у працах мінскага кінафестываля "Лістапад" і яго меньшага брата "Лістападзіка"
прымаюць студэнты Інстытута тэалогіі Белдзяржуніверсітэта і выхаванцы нядзельных
школ праваслаўных і каталіцкіх цэркваў сталіцы.
Асабліва шмат дзятвы было ў Доме Міласэрднасці, дзе малым гледачам паказалі старыя
добрыя карціны і мульцікі, а на пытанні дзяцей і падлеткаў адказалі стваральнікі
і акторы з фільмаў "Чырвоная шапачка", "Бураціна" , лялечных і маляваных анімацыйных
стужак. Гарачая дыскусія адбылася ў мурах Дома Міласэрднасці пры праглядзе конкурснай
стужкі "Актрыса" рэжысёра Гаварухіна. На пытанні студэнтаў-тэолагаў і членаў дыскусійнага
клуба Хрысціянскага адукацыйнага цэнтра імя святых Кірылы і Мятода адказаў актор
Віктар Сухарукаў. Падыходзіць да канца чарговае кіна-свята, якое на гэты раз
мела рэкордную колькасць гасцей: кінематаграфісты 42 краін пажадалі ўдзельнічаць
у мінскім кінафестывалі.Гледачы парадаваліся новым адкрыццям і асабіста пазнаёміліся
з любымі акторамі і рэжысёрамі, атрымалі ад іх аўтографы і адказы на пытанні. Як заўважыў
напрыканцы славуты і сапраўды народны артыст Расціслаў Янкоўскі - бясменны старшыня
мінскага фестывалю, "Лістапад" для яго стаўся сапраўдным сябрам, які дае новыя творчыя
сілы і радасць. Менавіта такую задачу - дарыць надзею, бадзёрасць і радасць - і
ставіць майстар перад сабою для служэння галоўнай асобе - гледачу.