Ina Rama kryeprokurorja e re e Shqipërisë

(22.11.2007 RV)Presidenti i Shqipërisë Bamir Topi, pasi deklaroi dje se akoma nuk kishte firmosur asgjë për fatin e kryeprokurorit Theodhori Sollaku, nënshkroi sot vendimin për largimin e tij nga detyra e propozoi kandidaturën e re, gjyqtaren nga Durrësi, Ina Rama.
Shkarkimi i kryeprokurorit është shoqëruar me debate të ashpra në parlament, ku opozita nuk ka pranuar të votojë. Përsa i përket 34 vjeçares Ina Rama, ajo është aktualisht gjykatëse e Gjykatës së Apelit për Krimet e rënda.

Vlora vazhdon protestën kundër ndërtimit të një termocentrali dhe të Petroliferës. Këshilli i Rregullimit të Territorit dhe kryetari i bashkisë, Shpëtim Gjika kanë bllokuar lejen e ndërtimit, për të respektuar vullnetin e qytetarëve dhe të Këshillit Bashkiak, të cilët duan që çështja të zgjidhet me referendum. Ndërkaq, sipas parashikimit, n ë Vlorë do të ndërtohen një seri veprash, prej të cilave më të rëndësishmet janë pa dyshim Termocentrali dhe rigazifikatori, por sidomos lidhja energjitike dhe gazsjellësi që do të bashkojë Shqipërinë me Italinë. Mesa duket pushtetarët e Tiranës e kanë konsideruar shifrën prej miliarda eurosh, që sillet rreth këtij projekti, më të rëndësishme se rikualifimi turistik i bregdetit të Vlorës. Nuk duhet harruar, se Bashkimi Evropian parashikon një diskutim publik të projekteve të tilla me përfshirjen e gjithë popullsisë së interesuar, si edhe studimit e impaktit ambiental.