Bashkimi Evropian përgatitet të zëvendësojë UNMIK-un në Kosovë
(22.11.2007 RV)Çështja e Kosovës u disktua sot në Moskë në takimin ndërmjet
ministrit të jashtëm rus, Sergei Lavrov dhe homologut të tij serb, Vuk Jeremiç. Rusia
shpreh sërish qëndrimin e saj të njohur mbi negociatat serbo-kosovare, sipas të cilit
rezultati duhet të jetë i pranueshëm për të dyja palët dhe duhet të bazohet mbi të
drejtën ndërkombëtare. Të njëjtën dëshirë për kompromis mes palëve e shprehu edhe
komisari evropian për zgjerimin, Olli Ren, i cili foli para Këshillit të Jashtëm të
parlamentit evropian. Por, me qartësinë e pragmatistit, ai theksoi se deri tani nuk
shihen hapa drejt një marrëveshjeje të mundshme. "Kosova është çështja e fundit e
hapur në Ballkan, prandaj i kemi dhënë Beogradit porosinë e qartë të mos e ndërlikojë
situatën", theksoi Ren. Ndërkaq, pavarësisht se bisedimet nuk kanë përfunduar,
Bashkimi Evropian përgatitet të zërë vendin e Kombeve të Bashkuara në Kosovë. Edhe
nëse kjo nuk do të bëhet nën ombrellën e një rezolute të OKB-së, për shkak të vetos
së Rusisë, avokatët e Brukselit mendojnë se gjithçka është e mundur me një ftesë të
autoriteteve kosovare dhe të Sekretarit të Përgjithshëm të OKB-së, në kuadrin e rezolutës
ekzistuese 1244. Një skuadër funksionarësh evropianë po përgatisin tashmë mirëseardhjen
e krejt stafit në ndërtesën e xhamtë, të ngritur për këtë qëllim mbi Prishtinë. Një
dyzinë makinash Tojota po zëvendësojnë pak nga pak makinat 4x4 të OKB-së. E Brukseli
ka shpallur konkurs për 1.400 policë.