Kriza dramatike në Somali: emërohet kryeministri i ri
(21.11.2007 RV)Në Somali, Nur Ade, 70 vjeç, ish-kolonel i policisë dhe president
i Gjysëmhënës së Kuqe ndërkombëtare, u emërua zyrtarisht kryeministër nga presidenti
i Republikës. Ndërkaq, në vend, vazhdojnë luftimet ndërmjet integralistëve islamikë
dhe trupave qeveritare e etiope. Ata që paguajnë çmimin më të lartë janë pa dyshim
civilët. Sipas Komisariatit të Lartë të OKB-së për Refugjatët, të zhvendosurit e brendshëm
kanë arritur shifrën 1 milion. 60% e popullsisë së Mogadishos është larguar nga qyteti,
ndërsa gjendja humanitare bëhet gjithnjë e më dramatike.
Në klimën e tensionit
të krijuar në Liban pas shtyrjes së zgjedhjes së presidentit për të premten, ministri
i mbrojtjes urdhëroi pezullimin e të gjitha lejeve për mbajtjen e armëve. Është
hera e katërt brenda një muaji, që parlamenti i Bejrutit nuk mbërrin të mblidhet për
të zgjedhur presidentin, për shkak të mosmarrëveshjeve ndërmjet mazhorancës dhe opozitës.
Nesër, do të shkojnë në Liban ministrat e jashtëm të Italisë, Spanjës dhe Francës,
në përpjekjen për të ndihmuar politikën libaneze të dalë nga situata.
Sapo
u kthye nga Arabia Saudite, presidenti i Pakistanit, Pervez Musharraf ashpërsoi
edhe më tej gjendjen e emergjencës, të shpallur më 3 nëntor. Me anë të një dekreti,
ndalon që gjendja e emergjencës të vihet në diskutim para ndonjë gjyqi apo çdo lloj
selie tjetër. E njëjta gjë, për masat që janë marrë pas deklarimit të emergjencës.
Ndërkaq, mësohet se gjatë vizitës së tij në Islamabad, i dërguari amerikan Xhon Negroponte
është takuar tre herë me gjeneralin Ashfak Kijani, të cilin Uashingtoni do të donte
ta shihte president ose kryeministër, dhe vetëm një herë me Musharrafin.