Modeli i dy Gjermanive për bisedimet serbo-kosovare, ndërsa konfirmohet Thaçi si fitimtar
i zgjedhjeve në Kosovë
(19.11.2007 RV)Ndërsa konfirmohet, pavarësisht se jo akoma zyrtarisht, kreu
i PDK-së Hashim Thaçi si fitimtar i zgjedhjeve të së shtunës në Kosovë, nuk mund të
mos vihet re pjesëmarrja e ulët në votime e qytetarëve. Jo vetëm serbët, të kontrolluar
nga Beogradi, por edhe shqiptarët nuk u janë afruar kutive të votimit. Pothuaj gjysma
e votuesve kanë preferuar t’i braktisin ato. Siç e vë në dukje edhe kreu i vëzhguesve
të Këshillit të Evropës, Xhovani Di Stazi, kjo tregon se politika, e përqëndruar vetëm
në çështjen e pavarësisë e jo edhe në problemet e vërteta, e ka lodhur popullsinë,
e cila çdo ditë duhet të përballet me mungesën e punës, me pagat e ulta e me vështirësi
të tjera ekonomike. Ndërkaq, Hashim Thaçi dhe presidenti aktual Fatmir Sejdiu
kanë mbërritur sot në Bruksel, ku nesër do të zhvillohet takimi serbo-kosovar me praninë
e Treshes së negociatorëve ndërkombëtarë. Sipas konfirmimit të ministrit të jashtëm
gjerman, Shtajnmajer, Trojka do t’u propozojë palëve si model për statusin e Kosovës,
marrëveshjen e bazuar mbi marrëdhëniet diplomatike ndërmjet Gjermanisë Lindore dhe
asaj Perëndimore pas vitit 1972. Për këtë kanë rënë dakord sot ministrat e jashtëm
të Bashkimit Evropian, të cilët kanë diskutuar problemin e Kosovës po në Bruksel.
Gjithsesi, ata akoma duhet të flasin me Rusinë dhe me SHBA-të. Traktati i nënshkruar
ndërmjet dy Gjermanive nuk ishte një njohje zyrtare e ndarjes, por një bashkësi marrëveshjesh
që rregullonin marrëdhëniet ndërmjet dy shteteve gjermane. Një vit më vonë, Republika
Demokratike Gjermane u pranua në OKB. Hashim Thaçi, sapo u përvijua fitorja e
tij, deklaroi se pas 10 dhjetorit shqiptarët do të shpallin menjëherë pavarësinë në
mënyrë të njëanshme. Deklarata shkaktoi jo vetëm reagimin e serbëve, por edhe thirrjen
e ministrave të jashtëm të Bashkimit Evropian për të mos u shpejtuar. Përfaqësuesi
i lartë evropian për Politikën e jashtme ka takuar sot në Bruksel si Thaçin, ashtu
edhe kryeministrin serb, Vojisllav Koshtunica, të cilët do t’i takojë edhe nesër pas
bisedimeve. Por të kthehemi tek 17 nëntori, tek zgjedhjet e rezultatet e tyre,
për të cilat na njofton nga Prishtina, bashkëpunëtorja jonë, Rabije Ibraj