Kryeministri Berisha prezantoi sot Alibej kandidat për ministër të ri të drejtësisë
(15.11.2007 RV)Dorëheqja e Ministrit të Drejtësisë, Ilir Rusmali i ka dhënë
hov të ri debateve ndërmjet politikanëve në Shqipëri. Sipas opozitës, kryeministri
Sali Berisha i ka dhuruar kokën e Rusmalit presidentit të Republikës, Bamir Topi,
në mënyrë që ky të konfirmojë largimin nga detyra të kryeprokurorit të përgjithshëm
Theodhori Sollaku. Është pra thjesht luftë klanesh brenda mazhorancës dhe jo dëshirë
për të luftuar korrupsionin. Ndërkaq, vetë presidenti Topi ka deklaruar sot gjatë
paraqitjes së një libri për funksionimin e Këshillit të Lartë të Drejtësisë, se vendimi
për Sollakun do të jepet sipas kushtetutës. Qeveria e Tiranës rendit 36 persona
në listën e zezë të financuesve të terrorizmit. Këta persona, kryesisht me origjinë
nga vendet e Lindjes së Mesme, bëjnë pjesë në listën ndërkombëtare të atyre që financojnë
Al-Kaedan dhe do t’u ndalohet me ligj investimi në Shqipëri. Ky vendim i Këshillit
të Ministrave e rrit numrin e personave në listën e hapur që në vitin 2004, në 42
vetë. Po ashtu, janë shtuar në listë edhe gjashtë firma të tjera, duke e rritur numrin
në 16.