Rrogat e mesme dhe të vogla vuajnë rritjen e çmimeve në Shqipëri
(09.11.2007 RV)Rriten përsëri çmimet në Shqipëri, mbi “tavanin” prej 4 përqindësh,
të përcaktuar si nivel maksimal nga qeveria shqiptare, Banka e Shqipërisë dhe Fondi
Monetar Ndërkombëtar. Në krye të listës së rritjeve qëndrojnë çmimet e ushqimeve,
të cilat tashmë shqiptarët i paguajnë mesatarisht 9,1 për qind më shtrenjtë, në krahasim
me tetorin e një viti më parë. Vërehet rritja shumë e lartë për bukën dhe drithrat,
prej 21,8 përqindësh, pasuar nga perimet, përfshirë pataten, që shënojnë një rritje
çmimesh prej 15,5 përqindësh. Natyrisht, këtë rritje e ndjejnë më shumë personat me
pagë të mesme dhe të ulët, për të cilët nuk është bërë deri tani ndonjë politikë e
veçantë.
Universiteti "Luigj Gurakuqi" i qytetit të Shkodrës, festoi sot,
me një sërë aktivitetesh, 50-vjetorin e themelimit. Për përgatitjen e këtij festimi
është ngritur prej kohe një komision i përbërë nga ish studentë, ish pedagogë dhe
ish rektorë. Komisioni është marrë me historikun 50 vjeçar të universitetit,
për të cilin u përgatit edhe një botim i veçantë. Ndërkohë u hap edhe një ekspozitë
pikture me punimet e studentëve dhe të pedagogëve të këtij universiteti. Sipas
rektorit, Profesor Doktor Mahir Hoti, aktivitetet kushtuar këtij përvjetori të rëndësishëm,
kanë nisur në fillim të kësaj jave, kryesisht në sektorin e kulturës dhe të sportit,
me konkurse letrare, promovime librash dhe gara e ndeshje sportive ndërmjet fakulteteve.
Ndërsa sot, në orën 17.00, në sheshin përpara Universitetit "Luigj Gurakuqi", u dha
një koncert festiv me pjesëmarrjen e këngëtarëve më të mirë shkodranë dhe të ftuar
nga Tirana, organizuar nga bashkia e Shkodrës në bashkëpunim me universitetin.
Ndërmjet autoriteteve të shumta, ardhur edhe nga jashtë, ishin të pranishëm Kryeministri
i Shqipërisë, Prof. Dr. Sali Berisha dhe Ministri i Arsimit dhe Shkencës, Genc Pollo.
Universiteti i akordoi disa tituj profesorëve më të shquar. U vizitua edhe biblioteka
e re, e ndërtuar me ndihmën e qeverisë austriake.