Presidenti i Pakistanit: zgjedhjet e reja brenda 15 shkurtit 2008
(08.11.2007 RV)Pak orë pas telefonatës jo shumë miqësore me presidentin amerikan Xhorxh
Bush, presidenti pakistanez Pervez Musharraf shpalli se zgjedhjet parlamentare në
vend do të mbahen brenda 15 shkurtit. Gjithashtu, ai konfirmoi se do të heqë dorë
nga detyra e kreut të ushtrisë. Lajmi u dha nga televizioni shtetëror, i vetmi që
vazhdon transmetimet pas shpalljes së emergjencës. Kësaj jave, Gjykata e Lartë
duhej të vendoste nëse zgjedhjet presidenciale të 6 tetorit, që i dhanë sërish fitoren
Musharrafit, janë zhvilluar në mënyrë të rregullt, por me shpalljen e emergjencës
të gjithë gjykatësit janë zëvendësuar me besnikë të presidentit. Ndërkaq, Partia Popullore
e Pakistanit, me në krye Benazir Buton denoncon sot se janë arrestuar me mijëra aktivistë
të saj.