Gjeorgji: policia në rrugë, Sakashvili i flet kombit
(08.11.2007 RV)Situatë relativisht e qetë në Gjeorgji, pasi dje presidenti
Mikhail Sakashvili dekretoi gjendjen e emergjencës për 15 ditë, duke akuzuar Moskën
dhe shërbimet sekrete ruse se kanë organizuar protestat e ditëve të kaluara në sheshe
me objektiv grushtin e shtetit. Opozita i ka ftuar përkrahësit e saj të mos kryejnë
aktivitete e manifestime për dy javët e emergjencës, për të mos rënë pre e abuzimeve
nga ana e policisë. Pavarësisht se është dakord me politikën filoperëndimore të
Sakashvilit, e cila e çon vendin drejt integrimit në NATO e në Bashkimin Evropian,
opozita e akuzon presidentin për autoritarizëm, korrupsion, paaftësi në përballimin
e varfërisë dhe kërkon dorëheqjen e tij. Manifestimet zgjatën gjashtë ditë, por dje
Sakashvili u dha fund duke ndërhyrë me polici e me gaz lotsjellës. Të plagosurit janë
508 vetë, ndër të cilët 94 të shtruar në spital. NATO-ja dhe Bashkimi Evropian kanë
shprehur shqetësimin e tyre për situatën.