Izrael: kriza e vizave vijon të shqetësojë priftërinjtë e rregulltarët katolikë.
(08.11.2007 RV)Kanë kaluar vite
të tëra nga koha e premtimeve të qeverisë izraelite, e megjithatë meshtarët e murgeshat,
sa herë që hyjnë e dalin nga Izraeli, kanë nevojë për një vizë të re hyrjeje, që u
lëshohet nga ana e një konsullate izraelite, me vështirësi jo të pakta. Duhet të kalojnë
muaj e muaj para se të kryhen praktikat për marrjen e një vize. Njerëzit që kryesojnë
Kishën katolike në Tokën Shenjte nuk kanë protestuar publikisht, duke mos dashur të
dëmtojnë marrëdhëniet me autoritetet civile izraelite, siç shprehet në mikrofonin
e Radios sonë, AtëDavid Jager, jurist françeskan i Rojtarisë së Tokës
Shenjte:
Përgjigje: - Problemi i vizave dhe i lejeve të qëndrimit po
kalon një periudhë të re krize. Sa herë që ndodh kjo, vonesat e refuzimet shkaktojnë
probleme të jashtëzakohsme për veprimtarinë baritore, për funksionimin e Kishës. Problemi
themelor është se në Izrael nuk ka asnjë normë për lëshimin e vizave e të lejeve të
qëndrimit, kështu që gjithçka lihet në dorën e nëpunësit të ditës që gjindet në sportel.
Prandaj e theksoj se duhen përcaktuar pikërisht rregullat që i lejojnë Kishës të programojë
veprimtarinë, duke e pasur të qartë kush mund të pranohet e kush jo, e sidomos, kur,
sepse në kushtet aktuale nuk mund ta zhvillojë normalsiht veprimtarinë baritore. Në
Marrëveshjen themelore të Izraelit me Selinë e Shenjtë të vitit 1993, është përcaktuar
vija e së drejtës së Kishës për të pasur personelin e duhur në institucionet e saj.
Ekziston edhe një marrëveshje për të përcaktuar pikërisht paktin mbi normat për lëshimin
e këtyre lejeve, gjë që deri më sot nuk është bërë realitet.