Njoftim për Koncistorin e 24 nëntorit lidhur me krijimin e 23 kardinajve të rinj.
Intervistë me imzot Komastrin: karriera e vetme është Parajsa.
(30.10.2007 RV)Zyra e Kremtimeve
Liturgjike Papnore publikoi dje njoftimin për Koncistorin e zakonshëm publik, që do
të mblidhet nga Papa më 24 nëntorin e ardhshëm në tremen e Bazilikës së Vatikanit,
për krijimin e 23 kardinajve të rinj. Ndërmjet tyre është edhe kryeipeshkvi Angjelo
Komastri, kryeprift i Bazilikës së Vatikanit, drejtor i Fabrikës së Shën Pjetrit
e vikar i Papës për Qytet-Shtetin e Vatikanit. Në mikrofonin e Radios sonë shpreh
emocionet e thella, duke na shpjeguar si e pret këtë ngjarje të madhe për të e për
mbarë Kishën:
Përgjigje: - Me emocion të madh e me merak të madh,
sepse edhe emërimi kardinalor është thirrje nga ana e Zotit; e përballë thirrjeve
të Hyjit, të gjithë jemi të padenjë e të papërgatitur. I lutem atij të Lumit, me ndërmjetësinë
e Virgjërës Mari, të më japë hirin për t’iu përgjigjur asaj që pret nga unë Ati i
Shenjtë, në mënyrë që vogëlsia ime të jetë vërtetë në dispozicion të karizmës së tij,
si pasardhës i Shën Pjetrit e kryebari i Kishës universale. E kjo, sepse detyra e
kardinalit është pikërisht të bashkëpunojë me Papën me të gjitha forcat, në mënyrë
që karizma e Papës të ndriçojë në Kishë e të jetë vërtetë në shërbim të unitetit për
mbarë Kishën.
Pyetje: - A do të ndryshojë jeta juaj, pasi të jeni lartuar
në dinjitetin e kardinalit?
Përgjigje: - Jeta ime mbetet ajo që ishte.
Është jetë e vënë në shërbim. Kardinalati nuk e ndryshon jetën, kardinalati të impenjon
të japësh më shumë, të impenjon, në se mund të shprehemi kështu – ta jetosh me heroizëm
më të madh thirrjen tënde.
Pyetje: - Ka njerëz që mendojnë se kardinajtë
janë princat e Kishës, larg popullit të Zotit. Ju ç’mendoni?
Përgjigje:
- Do të desha ta korrigjoj këtë mendësi. Edhe këto ditë, më se një herë kam dëgjuar
të më thonë: “Bëre karrierë!”. Më është dashur t’i korrigjoj, duke i sqaruar se në
Kishë nuk ekziston karriera: ajo që mendohet si karrierë, s’është tjetër veçse thirrje
për të shërbyer. E vetmja karrierë në Kishë është karriera e Parajsës. Në se nuk arrin
atje, atëherë ke dështuar, sepse ky është qëllimi kryesor i jetës. Gjithçka tjetër
është thirrje për shërbim: thirrje për ta shkrirë jetën në shërbim të Ungjillit, sepse
është e vetmja e mirë e jetës; thirrje për t’i shërbyer Jezusit, sepse është e vetmja
shpresë; thirrje për t’i kumtuar botës se Shëlbuesi është një i vetëm. Edhe kardinalati
shërben për këtë e vetëm për këtë.
Pyetje: - Shkelqësi, kardinali vishet
me rroba ngjyrë purpuri. Ç’ simbolizon kjo ngjyrë, që të kujton gjakun?
Përgjigje:
- Po ju a shpjegoj me fjalët që kam shkruar në ftesën për kremtimin e 24 nëntorit
të ardhshëm: “U kërkoj të gjithëve – e në këto fjalë është edhe shpjegimi - dhuratën
e një lutjeje, që purpuri të mos shprehë skuqjen nga turpi sepse nuk e kam dashur
Jezusin me gjithë zemrën time, me gjithë jetën time. Uroj, ndërkaq, që të shënojë
për mua fillimin e një përkushtimi të ri e bujar në shërbim të Ungjillit, deri në
dhurimin e gjakut. Ja, pra, ky është kuptimi i veshjes së kuqe: të mësosh çdo ditë
nga Maria mësimin e besnikërisë së përvujtë, të heshtur, fisnike ndaj Jezusit.
Pyetje: - Duke u bërë kardinal, ju do të lidheni edhe më ngushtë me Atin e Shenjtë.
Benedikti XVI sapo ka mbushur dy vjet e gjysëm në shërbim papnor. Ç’mendoni për tiparet
kryesore të kësaj papnie?
Përgjigje: - Mua më duket, ndonëse është
e vështirë të jap një vlerësim ose të bëj një lexim të ndërlikuar të kësaj papnie,
se Ati i Shenjtë Benedikti XVI pëlqen rolin e mësuesit, atij që jep mësim, që prin
duke kujtuar të vërtetën, sepse e vërteta nuk është diçka që ne mund ta përdorim
ashtu si dëshirojmë. Shën Pali thotë se ne nuk jemi padronë të së vërtetës, po shërbëtorë
të së vërtetës. Papa Benedikti XVI më duket se e ndjen këtë në mënyrë të jashtzakonshme.
Askush në Kishë nuk është zot i së vërtetës, por shërbëtor i së vërtetës e Benedikti
XVI na e kujton këtë orë e çast, përmes një mësimi metodik, të përhershëm, të urtë
e të thellë. Besoj se për këtë Kisha duhet t’i jetë pambarimisht mirënjohëse.