Papa në Engjëllin e Tënzot kushtuar 498 martirëve spanjollë të lumnuar dje në Sheshin
e Shën Pjetrit: “Çdo i krishterë duhet të jetë gati të japë jetën për Krishtin”.
(29.10.2007 RV)Martirizimi nuk
është përjashtim, nuk i përket vetëm pak njerëzve, por mund t’i ndodhë çdo të krishteri.
Këtë theksoi Papa dje, gjatë lutjes së Engjëllit të Tënzot në Sheshin e Shën Pjetrit,
ku u lumnuan 498 martirë të mbytur në Spanjë gjatë persekutimit fetar në vitet ’30
të shekullit të kaluar. Por Benedikti XVI foli edhe për martirizimin në jetën e përditshme,
për dëshminë e heshtur dhe heroike që japin shumë të krishterë, të cilët e jetojnë
Ungjillin pa asnjë kompromis, duke kryer detyrën e tyre. E të krishterë të tillë ndodheshin,
sigurisht, edhe ndërmjet turmës vigane, që mbushte përplot Sheshin e Shën Pjetrit.
Vetëm nga Spanja kishin ardhur për të marrë pjesë në këtë lumnim, numerikisht më
i madhi që është kremtuar nga Kisha katolike në rrjedhë të historisë së saj dymijëvjeçare,
më se 40 mijë vetë. E Papa u foli mijëra shtegtarëtve pikërisht për 498 të Lumët e
rinj, të mbytur për shkak të urrejtjes kundër fesë në vendin iberik ndërmjet viteve
1934 e 1937: “Fakti që sot shkruajmë në librin e të Lumëve një numër kaq të
madh martirësh, tregon se dëshmia e lartë e gjakut nuk është përjashtim, që i përket
vetëm disa individëve, por rast i mundshëm për gjithë popullin e krishterë. Është
fjala për burra e gra me moshë, thirrje e kushte shoqërore të ndryshme, që e paguan
me jetë besnikërinë e tyre ndaj Krishtit e Kishës së Tij”. Duke kujtuar liturgjinë
e së dielës, Benedikti XVI i krahasoi martirët me Shën Palin. Apostulli, i burgosur
në Romë, duke parë se po i afrohej vdekja, bën një bilanc plot mirënjohje e shpresë,
sepse e ka luftuar deri në fund betejën e mirë, e ka kryer vrapin, e ka ruajtur fenë”. “Është
në paqe me Hyjin e me vetveten, prandaj e përballon qetësisht vdekjen, me vetëdijen
se e ka shkrirë pa kursim gjithë jetën në shërbim të Ungjillit”. Muaji tetor,
që i kushtohet posaçërisht veprimtarisë misionare – kujtoi Ati i Shenjtë – mbyllet
kështu me dëshminë e ndritur të martirëve të Spanjës, që i shtohen martirëve Albertina
Berkenbrok, Emanuel Gomez Gonzales, Adilio Daronk e Franc Jegershteter, që u shpallën
të lum pak ditë më parë në Brazil e në Austri: “Shembulli i tyre dëshmon se
pagëzimi i ngarkon të krishterit detyrën që të marrë pjesë me guxim në përhapjen e
Mbretërisë së Hyjit, duke mos kursyer, po të jetë nevoja, as jetën”. Natyrisht
jo të gjithë – nënvizoi Papa – janë të thirrur për t’iu nënshtruar martirizimit të
egër, që kërkon gjak. Ka edhe martirizim në të cilin nuk derdhet gjak, por kjo nuk
e bën aspak më të lehtë. I tillë është martrizimin i Selina Kludzhinska Borzheskas,
bashkëshorte, nënë familjeje, vejushë, rregulltare, e cila u shpall e lume të shtunën
e kaluar, në Romë: “Është dëshmia e heshtur dhe heroike e shumë të krishterëve,
që e jetojnë Ungjillin pa kompromise, duke kryer detyrën e tyre e duke iu kushtuar
bujarisht shërbimit të të varfërve. Martirizimi në jetën e përditshme është dëshmi
shumë e rëndësishme në shoqëritë e shekullarizuara të kohës sonë. Është beteja paqësore
e dashurisë, të cilën çdo i krishterë, ashtu si Shën Pali, duhet ta luftojë pa u lodhur
kurrë; është vrapimi për të përhapur Ungjillin, që duhet ta vijojmë deri në vdekje”.