24 tetori Dita Botërore kushtuar Kombeve të Bashkuara. Sfida e reformave.
(24.10.2007)Sot kremtohet Dita
Botërore kushtuar Kombeve të Bashkuara. “Duhet të mësojmë si të konfrontohemi mbi
nevojat e reja dhe të sigurojmë standarte etike, integriteti dhe përgjegjësie për
të treguar se jemi në gjendje t’u japim përgjigje njerëzve në të gjithë botën”. Kjo
është thirrja e Sekretarit të Përgjithshëm të OKB-së, Ban Ki-Mun për këtë ditë. Ngjarja
e sotme kujton datën e miratimit të Kartës së OKB-së, më 24 tetor 1945. Në këtë moment,
Kombet e Bashkuara janë para reformave. Të dëgjojmë Sandro Kalvanin, drejtori italian
i Institutit ndër-rajonal të OKB-së për Krimin dhe Drejtësinë, institut që pati organizuar
kurse për magjistratët e papërvojë të Shqipërisë në vitet e para pas diktaturës: Kombet
e Bashkuara, në këtë moment, ndodhen në fillim të një reforme të madhe për të vënë
në qendër të shërbimeve të tyre personin dhe nevojat e terrenit. Në të kaluarën ka
pasur një lloj shpërndarjeje, për shkak të krijimit të Organizatave të specializuara
dhe për shkak të një këndvështrimi të ndryshëm mbi temat e zhvillimit njerëzor, të
drejtave të njeriut dhe sigurisë. Sot, kuptohet më shumë se Kombet e Bashkuara duhet
të ofrojnë shërbime si një realitet i bashkuar, pasi nuk mund të ndahen nevojat e
një fëmije në komponenten ushqimore, në atë të shëndetit, të edukimit apo të sigurisë
personale etj. Grupet përgjegjës për këto komponente duhet të punojnë sëbashku e kjo
do t’i mundësojë OKB-së të jetë më e shpejtë në ndërhyrje. Përsa i përket
punës suaj si drejtor i Institutit ndër-rajonal për Krimin e Drejtësinë, si është
gjendja aktuale? Është një situatë që shqetëson shumë, pasi globalizimi i ka
hapur kufirin çdo lloj njeriu, por edhe qarkullimit të mallrave, të parasë dhe të
shërbimeve. Është rritur jashtëzakonisht qarkullimi i njerëzve, por ky qarkullim
nuk është i lirë e prandaj, emigracioni paraqet problem. Kjo ka sjellë lehtësira të
mëdha për krimin e organizuar, i cili është me të vërtetë i globalizuar. Ka një aftësi
pasurimi të paligjshëm që korrupton vetë shoqërinë, minon bazat e demokracisë dhe
shkatërron marrëdhëniet e mira ndërmjet popujve. Duhet të gjejmë forma të përbashkëta
për të përballuar kërcënimet e krimit. Instituti im merret pikërisht me këtë. Shumë
është zbuluar tashmë. Nëse policia e Hong Kongut, nga policia më e korruptuar e botës
është bërë policia më efikase, do të thotë se ka teknika që mund të zbatohen në nivel
ndërkombëtar e që OKB-ja mund t’i ofrojë. Krimi ndoshta nuk do të zhduket, por është
e rëndësishme që të bëjë më pak dëme nga sa po bën sot.