Osama Bin Laden u kërkon terroristëve irakianë të qëndrojnë të bashkuar
(23.10.2007 RV)Osama Bin Ladeni,
sheiku i terrorit, flet sërish me anë të një mesazhi audio, transmetuar nga televizioni
arab Al Zhazira. Kreu i Al Kaidës nuk është i kënaqur me xhihadin në Irak dhe u bën
thirrje grupeve të ndryshme irakiane të bashkohen. Guerrilja islamike pra, po fragmentohet.
Cilat janë arësyet e këtyre përçarjeve? Në mikrofonin tonë, Loreta Napoleoni, gazetare
italiane, eksperte e terrorizmit: Që nga vdekja e Al Zarkauit, grupet janë shumëfishuar,
pikërisht sepse mungon figura karizmatike e liderit. Ky mesazh konfirmon gabimin që
është bërë duke mos e zëvendësuar Al Zarkauin me një figurë të ngjashme. Sa janë grupet?
Gjendemi përballë qindra e qindra grupesh, të lidhura me fise të ndryshme. Kemi përballë
një gjendje sektarizmi dhe fragmentimi ekstrem. Ky mesazh konfirmon gjithashtu
atë që thonë në fakt amerikanët. Rritja e numrit të ushtarëve në zonat më të nxehta
duket se fillon të funksionojë dhe të zvogëlojë dukshëm forcën e rebelimit islamik.