Solidariteti, mbrojtja e jetës dhe drama e pasigurisë: temat e mesazhit të Papës për
Javën Shoqërore të katolikëve italianë.
(19.10.2007 RV)Në mesazhin me rastin
e Javës së 45-të Shoqërore të katolikëve italianë, hapur dje në Pistoia në kuadrin
e njëqindvjetorit të nismës, Papa u drejton një thirrje të fuqishme të gjithë laikëve
katolikë, që të impenjohen me bujari e guxim në përpjekjen për ndërtimin e një shoqërie
të drejtë e solidare. Duke pasur parasysh se diskutohet për të mirën e përbashkët,
Benedikti XVI thekson emergjencat e kohëve tona: kujdesin për jetën e familjen, mbrojtjen
e punës dhe dramën e pasigurisë së jetës. Papa nënvizon rreziqet që lindin nga
përdorimi i papërcaktuar e nganjëherë edhe i papërshtatshëm i termit ‘pasuria e përbashkët’
e cila – shpjegon Papa – nuk është thjeshtë shumë e pasurive të veçanta, por pasuri
e të gjithëve dhe e secilit, ndërsa mbetet e përbashkët, sepse e pandashme e sepse
vetëm kështu mund t’u përkasë të gjithëve. Ashtu si në të kaluarën, edhe sot, në kohën
e globalizimit, pasuria e përbashkët duhet pasur mirë parasysh e duhet promovuar edhe
në marrëdhëniet ndërkombëtare, me vetëdijen se pasuria e çdo njeriu lidhet ngushtë
me pasurinë e mbarë njerëzimit. E në këtë kontekst, ka rëndësi të veçantë kërkimi
i unitetit reciprok, duke nisur nga krijimi i kushteve për ta gëzuar së bashku vlerën
e paqes, që i ka rrënjët në Krishtin e që siguron shërimin e plagëve të kujtesës.Tepër
aktuale për mendësinë e shqiptarëve, fjalët e Papës, duke pasur parasysh këndvështrimin
mbi pasurinë e përbashkët, shpërdorimin e saj e lidhjen e këtij shpërdorimi me plagët
që ka lënë në kujtesën e njerëzve një regjim i cili e përdori pasurinë e përbashkët
si pasuri personale.