4-vjetori i lumnimit të Nënë Terezës: Festë kombëtare e mbarë shqiptarëve
(19.10.2007 RV)Simbolik kalendari i sotëm historiko-kishtar: na kujton në të
njëjtën ditë, veprimtarinë misionare të së Lumes Nënë Terezë e të jezuitëve, etër
të saj shpirtëror, nëpër botë: nga Kanadaja e largët, në Shqipëri; nga vitet 1600,
në shekullin e kaluar. Sot kalendari kishtar përkujton 4-vjetorin e lartimit në nderimet
e elterit të së Lumes Nënë Terezë, misionares së madhe të Indisë e të mbarë botës,
Atë Gjon Faustin, martirizuar nga diktatura komuniste në në trojet shqiptare e
jezuitët kanadezë, martirizuar në një kohë të largët, nga popuj të paqytetëruar, në
Kanadanë e virgjër, ku nuk kishte arritur akoma Ungjilli i Krishtit. E ky përkujtim
– në prag të Ditës Botërore Misionare, që do të kremtohet të dielën e ardhshme. 19 tetor 2003 – 19 tetor 2006: kaluan katër vjet nga dita e lumnimit
të Nënë Terezës, Bijës më të madhe të popullit shqiptar, që na la trashigim këtë autoportret: "Me
gjak jam shqiptare; me nënshtetësi, indiane. Përsa i përket besimit, jam murgeshë
katolike. Sipas thirrjes, i përkas botës. Por zemra ime i përket plotësisht Zemrës
së Krishtit". M’u besua misioni të kumtoj dashurinë e etur të Jezusit për njerëzimin,
veçanërisht për më të varfërit ndër të varfër, mesazhin se "Hyji vijon ta dojë botën
dhe na dërgon ty e mua për t'u shprehur të varfërve dashurinë dhe mëshirën e Tij".
Në shpirtin tim, përplot me dritën e Krishtit e me dashuri të zjarrtë për Të, kishte
një dëshirë të vetme : "Të shuaja etjen e dashurisë së Tij për shpirtrat njerëzore". Nuk
na çuditë, prandaj, fakti se, për shkak të përhapjes së famës së shenjtërisë dhe hireve
të nxjerra me ndërmjetësinë e Nënë Terezës, Papa Gjon Pali II lejoi të hapej çështja
e kanonizimit pa u mbushur ende dy vjet pas vdekjes së Rregulltares shqiptare. Më
20 dhjetor 2002 miratoi dekretin mbi virtytet heroike dhe mrekullitë e bëra me ndërmjetësinë
e saj, ndërsa më 19 tetor 2003, katër vjet më pare, nga Sheshi i Shën Pjetrit përplot
me shqiptarë të ardhur nga të katër anët e botës, shqiptoi formulën që e lartonte
Nënën e Madhe të të varfërve të mbarë botës në nderimet e eletrit: FORMULA E
LUMNIMIT - shqiptuar nga Papa Gjon Pali II: Ne, duke përmbushur dëshirën
e Vëllaut tonë Lukas Sirkar, Kryeipeshkëv i Kalkutës, si dhe të shumë vëllezërve të
tjerë në Episkopat e edhe të shumë besimtarëve, pasi kemi marrë mendimin e Kongregatës
për Çështjet e Shenjtorëve, me Autoritetin Tonë Apostolik pranojmë që Shërbëtorja
e nderuar e Hyjit, Tereza e Kalkutës, tani e tutje të quhet "E Lume" e që festa e
saj të kremtohet në vendet e sipas regullave të caktuara nga e drejta kanonike, çdo
vit, në ditën e lindjes së saj për qiell, më 5 shtator. Sot,
pra, nuk është festa liturgjike e së Lumes Nënë Terezë, por Festa Kombëtare e Saj,
sepse kjo ditë, me të drejtë, u shpall festa e të gjithë shqiptarëve, për të cilët
Nënë Tereza tani ndërmjetëson nga qielli. Në përfundim të këtij përkujtimi, bëjmë
tonat fjalët e Papës Vojtila për të Lumen Nënë Terezë, shqiptuar në homelinë e Meshës
së Lumnimit të saj: “Ta lavdërojmë këtë grua të vogël, të dashuruar me Zotin, këtë
lajmëtare të përvuajtur të Ungjillit e bamirëse të palodhur e njerëzimit. Nderojmë
në të një nga personalitetet më të rëndësishme të epokës sonë. Ta pranojmë mesazhin
ta ndjekim shembullin e së Lumes. E nga Nënë Tereza kalojmë tek Atë Gjon Fausti
S.J.: emrin e Atë Faustit tani mund ta lexojmë në kalendarin e Kishës universale.
Njihet si martir i Kishës katolike gjatë persekutimit fetar në Shqipërinë komuniste;
konsiderohet si pararendës i dialogut islamiko –kristian e si dëshmitar i dashurisë
së krishterë e i fesë në kohët tona. Janë vetëm disa nga titujt që i njihen nga
bibliografia tejet e pasur, e cila flet për jetën dhe veprimtarinë misionare të jezuitit
martir, lindur në Broco, pranë Breshias (Itali) më 19 tetor 1899 e pushkatuar më 4
mars 1946 në Shkodër (Shqipëri) te Zalli i Kirit, pas mureve të varrezës së Rrëmajit,
ku jehoi e jehon ende brohoritja e tij dhe e martirëve të tjerë shqiptarë, që i ranë
përkrah: “Rrnoftë Krishti Mbret! Rrnoftë Shqipëria” Me sjelljen e me guximin e
tij, Atë Fausti u dëshmoi si të krishetrëve, ashtu edhe myslimanëve të Shqipërisë,
se ata që besojnë në Zotin e në jetën e pasosur, nuk janë skllevër të kënaqësive të
kësaj bote, skllevër të etjes për pushtet, për sukses, për pasuri, por janë në gjendje
ta përballojnë me qetësi e guxim vdekjen për t’i qëndruar besnikë një ideali të vetëm,
të pavdekshëm, atij të Ungjillit. Duke u larguar në hapësirë e kohë,
kujtojmë se kur, pas traktatit të Shën Zhermenit, Kanadaja iu rikthye Francës, më
se treqind misionarë jezuitë u nisën, që nga viti 1611 deri në vitin 1760 për
në Kanada, që të përhapnin në këto troje fjalën e Krishtit. Tridhjetë e gjashë u mbytën.
Ndërmjet tyre, tetë u shpallën të lum e më pas, më 29 qershor 1931, edhe shenjtorë.
Ndonëse e kryen veprimtarinë e tyre misionare në kohë e vende të ndryshme, të gjithë,
pa përjashtim, në zonën ndërmjet Liqenit të Ontarios, Ujëvarave të Niagarës dhe liqeneve
të Eriè de Uron, e përballuan martirizimin me të njëjtin guxim, ashtu si me guxim
përballuan edhe veprimtarinë tepër të vështirë misionare në një vend të virgjër e
të paqytetëruar. E kjo i afroi, përtej hapësirës e kohës, duke i lartuar së bashku
në qiellin e shenjtorëve e duke i shndërruar, në kujtimin e në lutjen e besimtarëve,
në simbole të të gjithë veprimtarisë misionare të kryer për ungjillëzimin e ‘Botës
së re’. Martirët kanadezë janë etërit jezuitë, Shenjtorët Gjoni de Brebëf, Gabriel
Lalemant, Isak Joges, Renato Gupil, Gjon de la Landre, Antonio Daniel, Natale Shabanel
dhe Karlo Garneir. Janë pajtorë të Kanadasë e të SHBA.