Takim i përzemërt i Papës me presidenten e Kilit, Mishelë Bashelè.
(18.10.2007 RV)Takimi i Papës me
zonjën Bashele, që zgjati rreth 40 minuta, u zhvillua sot në një atmosferë të ngrohtë
miqësore. Më pas presidentja kiliane u takua edhe me sekretarin e Shtetit të Vatikanit,kardinalin Tarçizio Bertone, i cili shoqërohej nga imzot Dominik Mambertì, sekretar
për marrëdhëniet me shtetet. Bisedimet e përzemërta – saktëson një komunikatë e
Sallës së Shtypit të Vatikanit – krijuan kushtet për shkëmbimin e informacioneve mbi
situatën shoqëroro–politike të vendit dhe mbi rolin e tij në Amerikën Latine. U prekën
tema me interes të përbashkët, si jeta e njeriut e familja, edukimi, të drejtat e
njeriut, drejtësia e paqja dhe tema të tjera që zënë vendin e parë në aktualitetin
ndërkombëtar. U ripohua - shkruhet në përfundim të Komunikatës – kontributi pozitiv
i Kishës në shoqërinë kiliane, posaçërisht në fushën shoqërore dhe edukative. Zonja
Bashele, socialiste, 56 vjeçe, është gruaja e parë kiliane që i shërben kombit të
saj në një detyrë kaq të lartë. Gjatë regjimit të Pinoçesë, u arrestua dhe u torturua
së bashku me t’ ëmën e t’anë, të cilët vdiqën nga torturat në burgjet e Santiagos
të Kilit. Presidentja Bashele, e diplomuar në mjekësi dhe e specializuar në pediatri,
pas një periudhe mërgimi, u rikthye në Kili ku, me rivendosjen e regjimit demokratik,
u emërua ministre e shëndetësisë dhe e mbrojtjes. Presidente u zgjodh më 15 janarin
e kaluar.Në përfundim të takimit, zonja Bashele shprehu kënaqësinë e saj për audiencën
tek Papa, duke uruar që Kisha e qeveria kiliane të vijojnë bashkëpunimin për të mirën
e popullit të Kilit. Por ta dëgjojmë vetë presidenten Bashele, në mikrofonin
e Radios sonë:
“Për mua është një privilegj i madh vizita e sotme, audienca
tek Papa, si presidente e Kilit dhe mundësia për t’i treguar ç’duam të bëjmë e ç’jemi
duke bërë. Falënderoj Kishën katolike për ndihmën që i ka dhënë vendit tim në çaste
të vështira, të rënda, por edhe në epokën e demokracisë. Folëm shumë e prekëm në thellësi
temat e rëndësishme për Kishën e për qeverinë time. U ndalëm tek dëshira për ta zhvilluar
vendin, për ta bërë modern, por duke mbrojtur familjet, duke krijuar kushte që fëmijët
të mos mbeten me një prind të vetëm, e posaçërisht, të mos braktisen, gjë që i shtyn
pastaj në rrugën e drogës e të dhunës. Në këto fusha shpresoj vërtetë se do të mund
të bashkëpunojmë ngushtë me Kishën për ndërtimin e një vendi më të zhvilluar ekonomikisht,
por edhe më njerëzor e më të pasur me vlera.