(16.10.2007 RV)“Shprehim mbështetjen tonë për Traktatin e mospërhapjes së armëve
bërthamore dhe për të gjitha programet bërthamore paqësore”. Kështu tha sot në Teheran,
presidenti i Rusisë, Vladimir Putin gjatë konferencës së shtypit në fund të samitit
të 5 vendeve të Detit Kaspik. Kjo është vizita e parë e një lideri rus në Iran, që
nga vizita e Stalinit në vitin 1943. Putin është takuar me presidentin iranian Ahmadinexhad.
Nga ana tjetër, sekretari amerikan i Mbrojtjes, Robert Gejts ka deklaruar se të
gjitha opcionet për Iranin mbeten të hapura. Gejts gjithashtu i ka bërë thirrje bashkësisë
ndërkombëtare të rrisë presionin dhe të zbatojë sanksione më të ashpra, për të frenuar
aspiratat bërthamore të Teheranit.