Shqetësim për fatin e dy meshtarëve të rrëmbyer në Irak e lajme të tjera
(16.10.2007 RV)Akoma shqetësim për fatin e dy meshtarëve siro-katolikë të rrëmbyer
të shtunën e kaluar në Mosul, në veri të Irakut. Sot paradite, rrëmbyesit kanë kontaktuar
krerët e kishës në Mosul dhe u kanë pohuar se Atë Pius Afas dhe Atë Mazen Ishoa janë
në gjendje të mirë shëndetësore. Është kërkuar pagimi i një shume të hollash.
Presidenti
amerikan, Xhorxh Bush takohet sot në Shtëpinë e Bardhë me liderin shpirtëror të
Tibetit, Dalai Lama. Nesër, Dalai Lama do të nderohet me medaljen e artë të Kongresit
amerikan. Kjo ka shkaktuar probleme në Pekin, nga ku zëdhënësi i Ministrisë së Punëve
të Jashtme ka paralajmëruar presidentin Bush, se takimi i tij me Dalai Lamën do të
dëmtojë marrëdhëniet mes dy vendeve.
Sekretarja amerikane e shtetit, Kondolica
Rajs, në vazhdën e vizitës në Lindjen e Mesme, qëndron sot në Egjipt, ku takohet
me presidentin egjiptian, Hosni Mubarak. Rajs është shprehur dje se krijimi i një
shteti palestinez është tashmë përparësia numër “një” e administratës amerikane. Sekretarja
e shtetit ndodhet në Lindjen e Mesme për të përgatitur konferencën ndërkombëtare ku
do të shtrohen për zgjidhje problemet e zonës, por as palestinezët dhe as izraelitët
nuk e kanë akoma të qartë se me çfarë programi do të paraqiten në të.
Para
kërcënimeve të Turqisë për një ndërhyrje në pjesën kurde të Irakut, kundër rebelëve
të Partisë së Punës së Kurdistanit që kryejnë atentate në zonën e Antalisë, qeveria
e Bagdadit ka kërkuar bisedime urgjente me Ankaranë. Kryeministri turk Erdogan
i ka kërkuar Irakut të luftojë ekstremistët kurdë në veri të vendit. Nga ana tjetër,
Komisioni Evropian i ka tërhequr vëmendjen Turqisë që të respektojë integritetin territorial
të Irakut e ta zgjidhë problemin me rrugë paqësore.