Përmirësimi i kushteve shoqërore e frenimi i sekteve fetare: këto janë përparësitë
baritore të Kishës në Brazil.
(09.10.2007 RV) “Të punojë
për të përmirësuar kushtet shoqërore në vend e posaçërisht, për t’i vënë fre përhapjes
shqetësuese të sekteve fetare”. Këto janë veprimtaritë baritore të dorës së parë për
Kishën braziliane, prelatët e së cilës, të kryesuar nga kryetari i Konferencës Ipeshkvnore
të Brazilit, kryeipeshkvi i Marianës, imzot Gjeraldo Lirio de Roka, u pritën në audiencë
nga Benedikti XVI. Intervistuam imzot de Rokën, duke i drejtuar së pari pyetjen: Pyetje:
- Ç’ kujtoi Papa nga vizita në Brazil? Përgjigje: - Kujtoi shumë çaste
e posaçërisht takimin me të rinjtë. Kam përshtypjen se ky takim ka lënë gjurmë të
thella në zemër të Papës, sepse foli për të me shumë emocion. Pyetje: -
Ç’ka ndryshuar në Brazil pas vizitës së Benediktit XVI? Përgjigje: - Para
së gjithash, entuziazmi, gëzimi, impenjimi më i madh i mbarë Kishës në Brazil, e jo
vetëm nga ana e ipeshkvijve e meshtarëve, por edhe e shumë laikëve, që zbuluan një
aspekt pak të njohur të personalitetit të Papës: mënyrën si u foli të rinjve e fëmijëve.
Pyetje: - Sfidat e Kishës në Brazil sot? Përgjigje: - Një nga
sfidat më të mëdha është situata shoqërore, që rëndohet vazhdimisht. Kur vuajnë njerëzit
tanë, vuan e gjithë Kisha. Problem tjetër është kalimi i besimtarëve tanë në emërtime
të tjera fetare. Kjo është një sfidë e madhe, sepse po rritet gjithnjë popullsia që
jeton në rrethinat e qyteteve të mëdha si dhe ajo që ikën nga vendi i vet për t’u
vendosur në zona të tjera të Brazilit e për të punuar kryesisht në bujqësi. E kjo
ka si pasojë braktisjen e rrënjëve fetare, gjë që i bën njerëzit të bien lehtësisht
nën ndikimin e sekteve. Kisha i kundërvë kësaj situate, krijimin e bashkësive të vogla,
në të cilat njerëzit mund të jetojnë më pranë njëri-tjetrit, ta ndihmojnë njëri-tjetrin
e sidomos, ta njohin e ta jetojnë Fjalën e Zotit, të ndjekin sakramentet e kremtimet.
Bashkësitë e vogla mund të bëhen edhe misionare për të tjerët në gjirin e vetë Kishës
së Brazilit si dhe në misionin ndërmjet popujve.