Fyerjet në parlament prishin marrëveshjen për reformat në Shqipëri
(02.10.07 RV)Për shkak të fyerjeve në parlamentin e Shqipërisë, prishet konsensusi
PD-PS për reformat e mëdha në vend. Pas një seance të karakterizuar nga fyerjet e
depytetëve ndaj njëri-tjetrit (fyerje të rënda personale që s’kanë të bëjnë me politikën),
socialistët braktisën punimet rreth orës 23:40. Pika më kulmore e tensionit u regjistrua
në çastin kur u hodhën për diskutim kërkesat e opozitës për ngritjen e tre komisioneve
hetimore parlamentare, respektivisht për procedurat e shitjes së Albtelekomit, për
procedurat e fillimit të punës për ndërtimin e TEC-it të Vlorës si edhe për hetimin
e shpenzimeve të buxhetit të shtetit. Mollë sherri, kërkesa e të djathtëve për të
mbuluar me hetime periudhën që fillon nga viti 2001 e më pas, kohë kur socialistët
ishin në pushtet, ndërsa të majtët kërkojnë që të bëhen hetime vetëm për dy vitet
e fundit. Kaq, dhe debate për probleme të tjera, kanë mjaftuar që deputetët ta
shndërrojnë Kuvendin në mejhanen me të ndyrë të rrugës dhe të fillojnë sharjet me
njëri-tjetrin, duke dhënë një spektakël, të cilin fatkeqësisht nuk mund ta etiketojnë
as si “të pashoq”, meqenëse nuk është hera e parë. Vlen gjithnjë shprehja “Stambolli
digjet…” . E si duket, askujt nga deputetët nuk i shkon ndërmend se janë përfaqësues
të zgjedhur të popullit, i cili nuk ua ka deleguar pushtetin që i takon, por thjesht
i ka zgjedhur të shtrojnë për zgjidhje në atë forum ligjvënës që është parlamenti,
problemet e hallet e veta.