Një e Lume e re në Kishën katolike: Maria Merkert.

(30.09.2007 RV) Sot, në Nisë të Polonisë u shpall e lume Maria Merkert, themeluesja dhe eprorja e parë e përgjithshme e Kongregatës së Motrave të Shën Elizabetës. E Lumja e re, lindur në vitin 1817, vdekur në vitin 1872, i jetoi të gjitha ngjarjet kryesore të shekullit XIX.
Mesha Shenjte me ritin e lumnimit, kryesuar nga kardinali Hose Saraiva Martins, prefekt i Kongregatës për Çështjet e Shenjtorëve, përfaqësues i Papës, u kremtua sot paradite në Kishën e Shën Jakut e të Shën Anjezes.Në mikrofonin e radios sonë, postulatori i çështjes së lumnimit, avokati Andrea Ambrozi, flet për karizmën e veçantë të Maria Merkert:
Përgjigje: - Thirrja e parë dhe themelore e çdo besimtari është të dojë Zotin e të afërmin, sepse dashuria për vëllezërit pasqyron dashurinë për Zotin: e Lumja ishte gjithnjë e vetëdijshme për këtë, prandaj u përpoq me të gjitha forcat ta dëshmonte këtë dashuri me gjithë jetën e vet. Vdekja e saj më 1872 nuk ia zbehu përmasën apostolike: sot figura dhe vepra e së Lumes janë të pranishme në shumë vende të botës, përmes veprimtarisë së bijave të saj shpirtërore, që vijojnë ta vënë në jetë karizmën fillestare në mënyrë vërtetë ideale.