(27.09.07 RV)Lahet me gjak protesta e murgjërve budistë dhe e mijëra personave
kundër regjimit të Mianmarit (ish-Birmanisë). Edhe në manifestimet e sotme regjistrohen
viktima e të plagosur. Sipas qeverisë, kanë humbur jetën 9 vetë dhe janë plagosur
11 të tjerë. Ndër viktimat edhe një fotograf japonez. Kontrollet e natës në manastiret
budiste, që shkaktuan 4 viktima e 850 arrestime nuk e ndalën protestën, megjithëse
qeveria e Jangonit e pati ndaluar manifestimin që dje. Ushtarë kanë kontrolluar edhe
një hotel, në përpjekjen për tua mbyllur gojën gazetarëve të huaj, që sipas qeverisë,
dizinformojnë publikun jashtë vendit. Ndërkaq, me mesazhet në celular e me bloget
në internet po përhapet në të gjithë botën ftesa për t’u veshur nesër me një këmishë
a një bluzë të kuqe, në shenjë mbështetjeje ndaj murgjërve budistë. Edhe Kina, vend
mjaft afër politikës së Mianmarit, i ka kërkuar xhuntës ushtarake të moderojë reagimin,
megjithëse dje pengoi miratimin e një rezolute të Këshillit të Sigurimit të OKB-së,
që parashikonte sanksione kundër xhuntës ushtarake birmane. Kundër rezolutës u shprehën
edhe Rusia e Indonezia.