Ndërroi jetë në Romë Atë Zef Pllumi: biografia, dëshmia e fra Ambroz Martinit, intervista
e fundit.
(26.09.2007 RV)Me hidhërim të thellë
njoftojmë se mbrëmë, më 25 shtator 2007, rreth orës 22. 10, në spitalin romak ‘Gemelli’
ndërroi jetë françeskani i njohur shqiptar, Atë Zef Pllumi. Lajmi i hidhur u përhap
menjëherë ndër miq e dashamirë, në Romë e në botë e, natyrisht, në kuvendet e fretërve,
në rrugët e rrugicat e Shkodrës, ku kaloi një pjesë të mirë të jetës, ku shërbeu si
meshtar e ku shkroi veprat e tij letrare e dokumentare, për të cilat meritoi titullin
e lartë ‘Nderi i Kombit’ si dhe çmimin e posaçëm të Ministrisë së Turizmit, Kulturës,
Rinisë dhe Sporteve “Penda e Artë’. Trupi i françeskanit të ndjerë do të mbartet
nga Roma në Shkodër, për t’u vendosur në katedralen e Shën Shtjefnit për homazhe.
Salikimet, në një datë e orë ende të pacaktuar, do t’i kryesojë imzot Rrok Mirdita,
në bashkëkremtim me imzot Angjelo Masafrën, me provincialin e provincës françeskane
të Zojës Nunciatë, Atë Gazmend Tinajn, me ipeshkvij e meshtarë të tjerë. Por për
hollësirat biografike dhe atmosferën që krijoi në Qytetin e Veriut kjo ngjarje e
hidhur, të ndjekim shërbimin e Jolanda Babës nga Shkodra: Ftuam në mikrofonin
tonë Atë Ambroz Martinin, i cili e njohu Atë Zefin që në vitin 1938, në rininë e
parë. Të të dy veshën zhgunin françeskan, të cilit i mbetën besnikë, duke u shuguruar
në rrethana krejt të jashtzakonshme: atë Zefi në kushte klandestine e Atë Ambrozi
i ikur jashtë atdheut, pikërisht për t’u bërë meshtar. Ta dëgjojmë Atë Martinin
në mikrofonin e dom David Gjugjës: Atë Zefi e ka
vizituar shumë herë Radio Vatikanin, duke na lënë trashëgim zërin e tij që, i gjallë
në arkivin tonë, na flet, na ngushëllon, na mëson, na porosit. Zgjodhëm për këtë ditë,
intervistën e tij të fundit dhënë Programit të Gjuhës Shqipe pranë Radio Vatikanit: