Përfundoi në Budapest Kongresi ndërkombëtar mbi ungjillëzimin e ri. Bilanc i kardinalit
Ruini.
(24.09.2007 RV)Budapesti - kryeqytet
i ungjillëzimit të ri: u bë nga 16 deri më 22 shtatori i kaluar, si seli e Kongresit
ndërkombëtar me temë: “Do t’ju jap ardhmëri e shpresë”. Ishte kongresi i pestë ndërkombëtar
i kësaj natyre, ky i Bukureshtit. Për herë të parë një Kongres i tillë u mbajt në
Vjenë, në vitin 2003, më pas në Paris në vitin 2004, në Lisbonë më 2005 e në Bruksel
më 2006. Sivjet, në takimin hungarez, përfundoi projekti i ungjillëzimit qytetar.
Për këtë rast Benedikti XVI emëroi si të dërguarin e vet të posaçëm, kardinalin Kamilo
Ruini, që mori pjesë në mbylljen e ‘Misioneve qytetare evropiane”. Të ndjekim bilançin
e Hirësisë së Tij, në mikrofonin e radios sonë: Përgjigje: - Bilanç shumë
pozitiv e do të thosha inkurajues: tregoi se Kisha e Budapestit është plot gjallëri
e se aspiratat misionare kanë depërtuar thellësisht në klerin e edhe në popullin e
Zotit. Pyetje: - Ç’ ju bëri më shumë përshtypje? Përgjigje: -
Fakti i zhvillimit të këtij misioni në kryeqytetin e një shteti që i përket Evropës
ish-komuniste, zonë në të cilën Kisha ka vuajtur shumë e për një kohë të gjatë. Ky
akt publik, i cili të enjten e kaluar u kurorëzua me Meshën shenjte nën qiellin e
hapur, me pjesëmarrjen e 15 mijë vetëve, nuk mund të mos ngjallë shpresa të mëdha. Pyetje:
- Ç’mesazh u përcollët hungarezëve, si i dërguar i Papës? Përgjigje: - U
përcolla kryesisht mesazhin e vazhdimësisë. Kongresi u zhvillua shumë mirë, por tani
duhet që zelli misionar të jetë përmasë e vazhdueshme e veprimtarisë baritore në dioqezën
e Budapestit, ashtu edhe në qytetet e tjera. Pyetje: - Si duhet vepruar
për t’i dhënë një hov të ri ungjillëzimit të Evropës? Përgjigje: - Duhet
punuar, sidomos, në nivelin e lutjes e të dëshmisë vetjake, por edhe në nivelin e
kulturës, me qëllim që kultura evropiane t’i rizbulojë rrënjët e veta të krishtera. Pyetje:
- Të krijohet përshtypja se të krishterët e Kontinentit të Vjetër ndjehen gjithnjë
më të veçuar… Përgjigje: - Ka, padyshim, forca që përpiqen t’i veçojnë.
Por, për hir të Zotit, ka edhe forca që u kundërvihen e që ripohojnë rëndësinë e pranisë
së krishterë. Besoj se popujt e Evropës po kuptojnë sa rëndësi ka krishterimi, e jo
vetëm për të kaluarën, por edhe për të sotmen, e sidomos për të ardhmen. Pyetje:
- Si mund të rifillojë dialogu ndërmjet rrymave të reja të mendimit e fesë së
krishterë? Përgjigje: - Ky dialog mund të rifillojë - e në fakt po rifillon
– pikërisht lidhur me problemet themelore që ka përpara Evropa: problemi i identitetit
të saj, por edhe problemi i njeriut: kush është njeriu, i kujt është, është një grimcë
e natyrës apo është krijuar sipas shembëlltyrës së Zotit; ka apo s’ka dinjitet të
patjetërsueshëm. Besoj se dialogu mbi këto tema tashmë është në vijim. Pyetje:
- Cilat janë shpresat tuaja? Përgjigje: - Shpresoj se ky hov misionar,
që nisi nga Roma – kujtojmë misionin qytetar të Romës në vitet ’96 e ’99, në përgatitje
të Jubileut të Madh – e që pastaj u shtri në shumë dioqeza të tjera italiane e tani,
në pesë kryeqytete evropiane, të jetë nxitje për mbarë Kishën e Evropës, me qëllim
që Ungjillëzimi i ri të mos jetë thjeshtë një parim të cilin e pohojmë, por një realitet
që e jetojmë.