Paqja, drejtësia, jeta, familja, lufta kundër terrorizmit në fjalën e Papës për politikanët
me frymëzim të krishterë të Internacionales Demokratike të Qendrës. Të pranishëm nga
Shqipëria, Berisha e Topalli
(21.09.2007 RV)Papa Benedikti XVI
priti sot në audiencë në Kastel Gandolfo, krerët e Internacionales Demokratike të
Qendrës dhe Demokratike të Krishterë, ndërmjet të cilëve edhe kryeministrin e Shqipërisë,
Sali Berisha dhe kryetaren e parlamentit, Jozefina Topalli. Të krishterët të jenë
“kripa” e veprimtarisë politike në të gjithë botën, me vlerat dhe idealet e tyre në
mbrojtje të jetës e të familjes dhe më gjerë, në mbrojtje të të drejtave themelore
të çdo njeriu. Kështu u tha atyre Ati i Shenjtë, i cili i nxiti edhe për një luftë
pa kompromis kundër terrorizmit dhe fondamentalizmit fetar që ai ushqen, me armët
e solidaritetit dhe lirisë së kultit. Të dëgjojmë Papën: “Në fakt, kur të drejtat
e njeriut dhunohen, plagoset vetë dinjiteti i personit; nëse drejtësia lëkundet, paqja
është në rrezik. Nga ana tjetër, drejtësia mund ta konsiderojë veten me të vërtetë
humane, vetëm nëse vizioni etik dhe moral mbi të cilin bazohet ka në qendër personin
dhe dinjitetin e tij të patjetërsueshëm”. Internacionalja Demokratike e Qendrës
përbëhet nga rreth 100 organizata që kanë përfaqësi si në Parlamentin evropian, ashtu
edhe në Organizatën e krishterë demokratike të Amerikës. Ajo ka për qëllim nxitjen
e krishterimit demokratik dhe të politikave centriste. Gjatë përshëndetjes që i drejtoi
Papës Benedikti XVI, kreu aktual i Internacionales, politikani italian Pier Ferdinando
Kazini ripohoi se organizmi është i impenjuar në kundërshtimin e politikave që kërcënojnë
njeriun. Papa, nga ana e tij, vuri në dukje fushat në të cilat ky impenjim duhet të
jetë i fuqishëm, që të pengojë forcimin e ideologjive, që mund të errësojnë ose ngatërrojnë
ndërgjegjet e njerëzve duke dhënë një vizion iluzionist të së vërtetës dhe të së mirës: “Për
shembull, në fushën ekonomike ekziston një prirje që identifikon të mirën me përfitimin
e kështu e zhduk forcën e ethosit nga brenda, duke kërcënuar edhe vetë përfitimin.
Disa mendojnë se arësyeja njerëzore është e paaftë ta kuptojë të vërtetën e si pasojë,
edhe të ndjekë një të mirë që i korrespondon dinjitetit të njeriut. Ekzistojnë pastaj,
ata që e vlerësojnë si të ligjshme eliminimin e jetës njerëzore në fazën para lindjes
ose në atë të perëndimit të jetës”. Është shqetësuese, vazhdoi Papa, kriza
në të cilën është zhytur familja, qelizë e rëndësishme e shoqërisë së themeluar mbi
martesën e pandashme ndërmjet një burri dhe një gruaje. “Përvoja – vuri në dukje Ati
i Shenjtë – tregon se kur e vërteta mbi njeriun shtrembërohet, kur familja minohet
në themelet e saj, vetë paqja kërcënohet, e drejta rrezikon të kompromentohet dhe,
si pasojë llogjike, shkohet drejt padrejtësisë e dhunës”. Por edhe mungesa e lirisë
fetare është kërcënim për paqen. Kjo e drejtë, që Benedikti XVI e përkufizoi si “themelore,
te domosdoshme, të patjetërsueshme e të padhunueshme, të rrënjosur në dinjitetin e
çdo qënieje njerëzore dhe të njohur nga dokumenta të ndryshme ndërkombëtare”, përmban
edhe të drejtën për të ndryshuar fe: “Hapja trashendentale përbën një garanci
të pazëvendësueshme për dinjitetin e njeriut, sepse ekzistojnë edhe dëshira e kërkesa
të zemrës së çdo personi që vetëm në Zotin gjejnë kuptim e përgjigje. Prandaj, nuk
mund të përjashtohet Zoti nga horizonti i njeriut dhe i historisë! Ja përse duhet
respektuar dëshira e përbashkët e të gjitha traditave të vërteta fetare për të shfaqur
publikisht identitetin e tyre, pa qenë të detyruar ta fshehin ose ta maskojnë”. Respekti
ndaj fesë, vazhdoi Papa, kontribuon edhe në përgënjeshtrimin e akuzës se njerëzit
kanë harruar Zotin, me të cilën disa rrjete terroriste përpiqen të justifikojnë kërcënimet
e tyre ndaj sigurisë së shoqërive perëndimore: “Terrorizmi paraqet një fenomen
shumë të rëndë, që shpesh arrin të instrumentalizojë Zotin dhe të përçmojë në mënyrë
të pajustifikueshme jetën njerëzore. Natyrisht që shoqëria ka të drejtë të mbrohet,
por kjo e drejtë, si çdo e drejtë tjetër, duhet ushtruar në respektin e plotë të rregullave
morale dhe juridike edhe përsa i përket zgjedhjes së objektivave e të mjeteve… Terrorizmi
duhet luftuar me vendosmëri dhe efikasitet, me vetëdijen se nëse e keqja është një
mister i përhapur, solidariteti i njerëzve për të mirën është një mister edhe më i
pushtetshëm (i përhapur)”. Benedikti XVI i përshendeti rreth 200 anëtarët
e Internacionales Demokratike të Qendrës, duke përsëritur bindjen e tij të thellë
se koherenca e të krishterëve është e domosdoshme edhe në jetën politike, në mënyrë
që “kripa” e impenjimit apostolik të mos e humbë “shijen” e vet dhe “drita” e idealeve
ungjillore të mos errësohet Të krishterët të jenë “kripa” e veprimtarisë politike
në të gjithë botën në veprimtarinë e përditshme.