Ekipi i Unitetit në Londër: Kosova do të jetë e pavarur

(19.09.2007 RV)Përfundoi sot në Londër takimi i Trojkës së negociatorëve për statusin e Kosovës me përfaqësuesit nga Ekipi i Unitetit, me në krye presidentin Fatmir Sejdiu. Kosovarët ngulën këmbë në shpalljen pa kushte të pavarësisë. Në gazetat e sotme, citohej përfaqësuesi evropian, gjermani Volfgang Ishinger, me një deklaratë që ravijëzonte si status përfundimtar të Kosovës jo pavarësinë, por autonominë e zgjeruar brenda Serbisë. Ishinger, sipas presidentit Sejdiu, përgënjeshtroi lajmin duke sqaruar se gazetat i kanë interpretuar keq fjalët e tij.
Delegacioni serb u takua me Trojkën mbrëmë. Duke përsëritur qëndrimin kundër pavarësisë së Kosovës, serbët paraqitën një plan prej 5 pikash diskutimi me delegacionin shqiptar në takimin e ardhshëm të 28 shtatorit në Nju Jork, ku për herë të parë palët do të takohen ballë për ballë. Gjithsesi, zëdhënësi i delegacionit Sllobodan Samarxhiq deklaroi se Beogradi nuk pret shumë nga ai takim.
I të njëjtit mendim, edhe ministri i jashtëm danez Soren Gade, i cili ndodhej sot për vizitë në Kosovë. Sipas tij, edhe nëse arrihet një marrëveshje deri në dhjetor, jo të gjitha palët në Kosovë mund ta pranojnë atë.