Marrëveshja për paqë, situata në Darfur dhe liria fetare në qendër të takimit të Benediktit
XVI dhe presidentit sudanez Omar Al Bashir
(13.09.2007 RV) Sot paradite Ati
i Shenjtë Benedikti XVI priti në audiencë në rezidencën verore të Kastelgandolfos
presidentin e Sudanit Omar Al Bashir të shoqëruar nga ministri i jashtëm, ai çështjeve
fetare, nga katër ministra të tjerë dhe disa parlamentarë. Omar Al Bashir pati një
takim edhe me Sekretarin për Marrëdhëniet me Shtetet Imzot Dominik Mambertì, i cili
ka qenë nunc apostolik në Sudan. Audienca u zhvillua në “një klimë shumë respektuese”,
komentoi drejtori i sallës së shtypit të Vatikanit Atë Federiko Lombardi... Në
qendër të takimit ndërmjet Papës dhe presidentit sudanez, që zgjati 25 minuta, ishte
gjendja politike dhe fetare në Sudan, duke u ndalur veçanërisht tek Marrëveshja për
Paqë dhe tek situata në Darfur. Lidhur me këtë u komentua shumë pozitivisht thirrja
për një konferencë të re për paqen, në Libi, me 27 tetorin e ardhshëm. Gjithashtu
u përmend edhe aspekti rajonal i krizës. Benedikti XVI dhe presidenti sudanez folën
pastaj edhe mbi tema të rëndësishme me interes të përbashkët si mbrojtja e familjes,
respekti dhe promovimi i të drejtave të njeriut, siç është ajo thelbësore e lirisë
fetare, rëndësia e dialogut ndërfetar dhe bashkëpunimi ndërmjet besimtarëve të të
gjitha feve, veçanërisht ndërmjet atyre të krishterë dhe myslimanë për mbështjetjen
që i duhet dhënë paqës dhe së mirës së përbashkët.