4 верасня Каталіцкі Касцёл у Беларусі ўзгадвае 11 сясцёр назарэтанак з Навагрудка.
1 жніўня 1943 года яны былі расстраляныя фашыстамі за некалькі кіламетраў ад свайго
кляштара. 5 сакавіка 2000 г. Ян Павел ІІ абвесціў іх благаславёнымі. Падчас беатыфікацыі
Папа сказаў: «Вы — найкаштоўнейшая спадчына Кангрэгацыі назарэтанак, спадчына усяго
Хрыстовага Касцёла на ўсе часы, асабліва ў Беларусі». Сёстры назарэтанкі прыбылі
ў Навагрудак у 1929 г. па запрашэнні тагачаснага пінскага біскупа Зыгмунта Лазінскага.
Яны павінны былі ўзяць пад апеку Белую Фару (касцёл Перамянення Пана), а таксама заняцца
выхаваннем і навучаннем мясцовых дзяцей. Жыхары мястэчка любілі сваіх сясцёр. Гаварылі
пра іх «нашы сёстры». «Яны былі найлепшымі сёстрамі для ўсіх і найпакорнейшымі слугамі
Пана», — узгадваюць сёння тыя, хто іх памятае.