Në mesazhin për Asamblenë III Ekumenike Papa uron "një dialog të së vërtetës dhe takimin
në shenjën e vëllazërimit"
(05.09.2007 RV)Dita e dytë e Asamblesë III Ekumenike evropiane në Sibiu të
Rumanisë u karakterizua nga lutjet e përbashkëta, mesazhi i mirëseardhjes së presidentit
rumun Basesku e urimet e përfaqësuesve të botës katolike, protestante dhe ortodokse.
Papa Benedikti XVI i dërgoi mesazhin e tij Asamblesë, në të cilin shpreh “shpresën
e gjallë” që rruga ekumenike të shkojë përpara. “Dy elementë duhet të jenë për
ne orientim në impenjimin tonë – shkruan Papa: dialogu i së vërtetës dhe takimi në
shenjën e vëllazërimit. Të dyja kanë nevojë për ekumenizmin shpirtëror si bazë”. Më
pas Ati i Shenjtë citon Koncilin II të Vatikanit, që pati vënë theksin në shembullin
e të krishterëve e shenjtërimin e jetës nga njëra anë, dhe lutjet private e publike
për bashkimin e të krishterëve nga ana tjetër. Papa kujton rrugën e bërë deri tani
e sidomos Enciklikën e Gjon Palit II “Ut Unum sint” (Që të gjithë të jenë një). Përmend
asambletë e mëparshme në Bazel të Zvicrës e në Grac të Austrisë deri tek nënshkrimi
i Kartës Ekumenike në Strasburg, në vitin 2001. Papa është i bindur se të krishterët
janë të thirrur të kontribuojnë në përparimin e vërtetë të shoqërisë evropiane, në
lindje e perëndim, e pikërisht për këtë takimi i Sibiut do të ofrojë direktiva të
çmueshme. I uroj asamblesë – përfundon Benedikti XVI – të krijojë hapësira takimi
për unitetin duke respektuar ndryshimet e ligjshme. Me bindjen se rrënjët e përbashkëta
të krishtera janë më të thella se sa ndarjet – u shkruan Papa pjesëmarrësve – do të
jetë e mundur të thyhet edhe një lloj mendjemadhësie e gënjeshtërt dhe të kapërcehet
indiferenca, duke eksperimentuar shpirtërisht bazën e përbashkët të fesë sonë. Metropoliti
Daniel, i ngarkuari me punë pas vdekjes së Patrikut ortodoks Teoktist dhe Patriku
Ekumenik Bartolomeu I theksuan gjatë mbledhjes së parë të Asamblesë se nga Sibiu i
duhet kujtuar Evropës se drita e mesazhit ungjillor ka vendosur themelet e qytetërimit
evropian, gjithnjë në dialog me fetë dhe kulturat e tjera. Problemi kryesor i bashkimit,
qëndron edhe në mënyrën e ndryshme me të cilën Kishat shohin qëllimet e tyre finale.
Temës iu kthye edhe kardinali Valter Kasper, presidenti i Këshillit Papnor për Nxitjen
e Bashkimit të të krishterëve, i cili foli për kritikat, sidomos nga bota evangjeliste,
ndaj dokumentit të fundit të Kongregatës për Doktrinën e Fesë, që trajton temën e
marrëdhënieve të kishës katolike me kishat e tjera. “Nuk duhet t’i fshehim plagët
– tha ai . Një ekumenizëm përkëdheljesh e sa për sy e faqe nuk na ndihmon të bëjmë
përparime”. Shtoi se ndarjet e të krishterëve në histori janë arësyeja për shekullarizimin
e sotëm të kontinentit evropian. I të njëjtit mendim edhe kardinali Peter Erdë,
president i Këshillit të Konferencave Ipeshkvnore të Evropës, në mikrofonin tonë: Evropa
ka nevojë për Krishtin e ne të gjithë duhet të dëshmojmë dashurinë dhe të vërtetën
e tij. Ka shumë pika ku të krishterët mund të dëshmojnë bashkërisht. Pikërisht kjo
gjë justifikon nevojën e edhe rëndësinë e këtij takimi.