Papa dënon veprat kriminale që vëjnë në rrezik sigurinë e personave e shkatërrojnë
pasurinë e ambientit
(29.8.2007. RV)Papa Benedikti XVI dënoi
ashpër “nismat kriminale” të piromanëve, të cilët me “sjelljen e tyre të papërgjegjshme”
vëjnë në rrezik sigurinë e personave e shkatërrojnë pasurinë natyrore”: kështu tha
Papa sot në audiencën e përgjithshme, mbajtur në Sheshin e Shën Pjetrit në Vatikan,
të mbushur përplotë me afër 12 mijë besimtarë të ardhur nga vendet e ndryshme, Papa
iu referuar në veçanti urgjencës së zjarreve në Evropë. I hidhëruar dhe i brengosur
për disa “fatkeqësi të rënda“ që kanë ndodhur ditëve të fundit, Ati i Shenjtë, posaçërisht
iu referua “vërshimeve që kanë goditur disa Vende lindore si dhe zjarreve shkatërrimtare
në Greqi, në Itali e në Vende tjera evropjane”. “Para urgjencave kaq dramatike,
që kanë shkaktuar viktima të shumta e dëme të mëdha materiale, nuk mund të mos jesh
i brengosur për sjelljen e papërgjegjshme të disave që vëjnë në rrezik sigurinë e
jetës së personave dhe shkatërrojnë pasurinë natyrore, që është një e mirë e çmueshme
për mbarë njerëzimin”. Këndej dënimi dhe kërkesa e lutjeve të posaçme nga ana e
Papës: “Bashkohem me ata që më të drejtë dënojnë nisma të tilla kriminale
dhe i ftoj të gjithë të lutemi për viktimat e kësaj tragjedie”.