“Me Nënë Terezën”: ‘Liria absolute gjendet duke dhuruar gjithçka’:emisioni XX
(23.8.2007. RV)Dëgjues të nderuar
vijojmë me rubrikën e përditshme radiofonike duke ecur gjurmëve të madhës të Lumes
Nënë Terezë, Gonxhe Bojaxhiut, Engjëllit të të varfërve, dëshmitarës autentike të
Ungjillit të Krishtit, lapsit të Zotit. E duke shfletuar librin ‘Jeta ime’ çdo ditë
më tepër zhytemi në këtë oqeanin e pakufijshëm të hirit e të përdëllimit të Hyjit
që shkëlqenin në personin e Nënë Terezës. Ajo në mënyrë të mrekullueshme diti
t’i gërshëtonte e mishëronte në gjeste konkrete, hirin dhe përdëllimin e Zotit me
lirinë e gatishmërinë e paskajshme njerëzore duke i dashur e shërbyer më të varfërit
ndër varfër në lirinë e plotë, duke u bërë Motër e Nënë e atyre personave që njerëzimi
bashkëkohor i mohonte e mjerisht vazhdon ende sot t’i mohoi e menjanoi ….thua se nuk
janë pjesë e pandashme e një trupi e shpirti njerëzor. Po vetëm kush, si Nënë Tereza,
gëzon lirinë e vërtetë mund të kryejë vepra të vërteta dashurie. Po, etja për liri
është një nga ndjenjat më fisnike njerëzore. Është ajo që e shtyn njerëzimin përpara.
Në kërkim të lirisë së plotë njerëzit shpesh kanë flijuar edhe ndjenjat më të fisme.
Mjafton të kujtojmë vargjet e famshme të poetit hungarez Shandor Petëfi. “Për dashurinë
jap jetën, për lirinë jap dashurinë”, për ta kuptuar se liria është një nga pasuritë
më të mëdha të e njeriut. Po sa e vështirë është të gjindet liria absolute. Për ta
gjetur, nuk duhet të japësh shumë, por gjithçka. Atëhere, ku e si duhet ta kërkojmë
lirinë? Në emisionin XX të ciklit tonë radiofonik “Me Nënë Terezën”, bazuar tek
libri ‘Jeta ime’, Motra e Lume shqiptare e bamirësisë na tregon sesi në Kongregatën
e saj rregulltare Motrat e rejat e gjejnë lirinë absolute – duke dhuruar gjithçka.
"Çdo
ditë bëhen gjithnjë më të shumtë njerëzit që pyesin me interes e këmbëngulje si mund
të na ndihmojnë për ta kryer punën tonë. Ne u krijojmë mundësinë të punojnë për
dashuri, duke kryer gjeste krejt të thjeshta, siç është ai i ndihmës që mund t’i japin
ndonjë prej njerëzve të familjes së vet, para se të kalojnë më pas tek të afërmit
që banojnë pranë e tek të varfërit, që banojnë më tutje. Kur vendoset kjo lidhje
(dëshiroj të sqaroj se unë nuk kërkoj kurrë para; kërkoj vetëm të vijnë e të shikojnë,
të takohen me të varfërit tanë), pra, kur lidhja vendoset, atëherë nuk është e vështirë
të mendohet ç’duhet bërë. E të fillohet puna me vendosmëri e dashuri. Gjëja më
e bukur që kanë të rinjtë është bujaria e tyre. Zakonisht u japim një fletë për
ta përpiluar, duke iu përgjigjur pyetjes: “Pse dëshiroj të hyj ndër Misionaret e Bamirësisë?”. Shumë
prej tyre shkruajnë: “Kërkoj të bëj një jetë të varfër, me lutje e flijim, që më
çon tek shërbimi ndaj të varfërve”. Shpesh mendojmë se të rinjtë i tërheq më shumë
puna. Por nuk duhet të çuditeni, në se ju them se është krejt tjetër gjë ajo që
i tërheq: i tërheq jeta në varfëri. Të rinjtë tanë dëshirojnë një gjë të vetme:
të japin gjithçka, ose asgjë. Sado tërheqëse të jetë puna, duhet të mos lidhemi
shumë me të e të jemi gati për ta lënë. Mund të jemi duke bërë tepër mirë në një
vend, por dëgjesa na detyron ta lemë e të shkojmë gjetiu. Duhet të jemi gati të
shkojmë. Puna nuk është jona. E bëjmë për Jezusin. Mund të jemi të lodhura
e të këputura nga puna. Mund edhe të vdesim nga lodhja e tepruar. Në se puna
nuk thuret me dashurinë, është krejtësisht e panevojshme. Po kujtoj këtu shembullin
e një të reje shumë të pasur, që më shkroi sa vijon: “Ka vite që Jezusi më thërret
për jetë rregulltare. Po përpiqem të zbuloj ku dëshiron të shkoj. Kam qenë në shumë
vende e kam parë se kishin të njëjtat gjëra, që i kam edhe unë. Në se do të hyja në
vende të tilla, nuk do të më duhej të hiqja dorë nga asgjë…”. Kjo e re dëshironte
të jipte gjithçka: donte të hiqte dorë nga të gjitha, për ta ndjerë veten plotësisht
të lirë. Për këtë arsye ne e quajmë varfërinë liri: është lira jonë absolute".